بينـي وبيـن الشـقـا ســلام رديّــه
يفتـل جروحـي وانـا انقضهـا بموالـي
عيّدبـي الهـم واثـر الـدمـع عيـديّـه
ولانـي بذاخـره دام عيـونـي عيـالـي
يـا عيـن هلّـي دموعـك كـل عصريّـه
وان لمتك فيوم قولي : ( مالـك ومالـي )
محتـاج طـاروق لـه معـنـى وقافـيّـه
واستبشـري خيـر ! والشعـر يتهيّـالـي
القـدح مـن فكـري وفالـراس جنـيّـه
وان حضّرت بي كتبت العالـي العالـي
ما شلتها عرضـه ! ولا هـي هجينيّـه !
غنّيتهـا مــدري الـطـاروق غنّـالـي
بـس الوكـاد إنهـا : قصّـه غرامـيّـه
ابطالهـا هـمـي وغـمـي وغربـالـي
وان قالـوا النـاس : ذا طبـع الهواويّـه
قلت : استوى عنـدي التريـاق والحالـي
العشـق بلـوى ونفسـي فـيـه مبلـيّـه
خلونـي اكتـب وافضفـض لا تفضالـي
المسألـه أكبـر مـن احــلام ورديّــه
الحـزن لا مـن لفـا جيتـه علـى فالـي
حزني واعرفه واعـرف ابسـط مواريّـه
ولاني لحالي كثير اللـي عـرف حالـي !
يـا وجـد حالـي وجـود اللـي هقاويّـه
خانتـه باغلـى رفيـق ولا لقـى والــي
وياوجـد حالـي وجـود اللـي بناخـيّـه
عن عسر حاله وضيقـه دالـه وسالـي !!
فـي غيبـة الـلـي تـمـادى بالانانـيّـه
وخلانـي بوجـه حزنـي واقـف لحالـي
يـا موّسـع الضيـق لامـن مـر طاريّـه
كن الوسيعه تضيق ان مـر فـي بالـي !!
وين انـت ؟ ياللـي غيابـك مثـر ٍ فيّـه
غايب !! واحسك معي !! واشوفك قبالي !!
طيفـك ليـا مـر حاجـه لا إراديّــه !
اتبع سرابـه واجيـه اسابـق ظلالـي
ياللـي مـن حروفـك تغـار الرومنسيّـه
والله قبـل لا افقـدك فاقـدك جوّالـي !!
في ( بحّتك ) شي ؟! يشبه حزن مرثيّه !!
ومن غاب صوتك وانا اللي صدق يرثالـي
وعيونـك الـسـود إعـجـاز وخيالـيّـه
نـادر شبههـا مثـل مـا تنـدر خصالـي
ونظرتـك تهـدم كيانـي بكـل عفـويّـه
سلهم وشف كيـف يبـدى فـي ّ زلزالـي
وعـودك ليـا مـال يـا المتـرف بحنيّـه
قمـت اتعـزوى واطـوّح لجلـه عقالـي
وقلبـي علـى ظمّتـك يسـابـق يـديّـه
ويردنـي طيـب ابـوي ومرجلـة خالـي
تكـفـون يالـلـي تمـرونـه علانـيّـه
قولوا له : الموت لامن غـاب يبرالـي !
وقولوا له : ان غيبتـه مـا هيـب عاديّـه
وخلـوه يرجـع يشـوف بعينـه احوالـي
وقولوا لـه : انـه ذبحنـي لعنبـوا حيّـه
ما يرحم الشوق غالـي ينتظـر غالـي !!
وقولوا لـه : ان صـد والصـده نهائيّـه
اشوالي آصـد !! لا والله وش اشولـي !!
حيـل الله اقـوى عساهـا روحـه بجيّـه
وعسـاه مـا يبطـي ويرجـع ويسعالـي
وقولوا لـه : الله حسيبـه كـان لـه نيّـه
ما عاد يرجع لـي وقولـوا لـه التالـي :
حرام كلّي ( ظمـا ) وايديـه ( وسميّـه )
وحرام ( مالي أمل ) مدامه ( آمالـي ) !!
