تنتهي كل المعارك و انتي فيني مستمره
لعنبو جد الجيوش اللي تدربها بنيه
كنت احسْب ان الرجال اقوى مخاليق المجره
لين جربت و عرفت ان النسا اقوى شويه
كيدهن .. يا ساتر استر .. كيدهن .. يا كافي شره
و انتي بس انتي لوحدك عن عشر من بعد ميه !
بعتبر جورك حنان .. و الجفا .. يا حلو مُره !
الهوى بلوه و لكن .. للمحب احلى بليه
ادري قلبك لو رحمني بالهوى ما شي يضره
و ادري تختبرين صبري ولا لك غايه خفيه
لو عظيم الهم يغزي .. ما يهز مثقال ذره
ابشري بأيوب حبك .. يالغلا نذر ٍ عليه
لو جيوشي في غلاك استشهدت سبعين مره
راضي ٍ اخسر .. و لكن انسحب !! .. هذي قويه