و كلْ ما قلت لك ودي اشوفك.. تخلق الأعذار
و انا لا جارت ْظروفي تنادي ودي آشوفك !
حبيبي لي متى و احنا نعذّب نفسنا باصرار ؟
احبك .. و انت متردد .. و دايم عذرك ظْروفك
انا ما شفت في عمري حبيب ٍ يقتل الأزهار
ولا قد شفت في عمري حبيب ٍ يشبه وصوفك
تباهى في كثر صدك و تتمتع بهالتكرار
ولا كنك بشر عندك خفوق ٍ ينبض بجوفك !
اذا جيت اعزف اشواقي .. اشوفك تقطع الأوتار
و اذا جيت احلم بقربك .. اشوفك تنهر طيوفك !
دخيل اللي بلاني بك .. دخيله سايق الأقدار
ترحّم و ارفق بحالي قبل ما امل و اعوفك
ولا تزعل اذا عفتك .. ترى عيب ٍ علينا و عار
تكذّب واقع ظروفي و اصدق كذبة ظروفك
كثير احيان خيّرتك و شفتك ما تبي تختار
تبي تتلاعب بقلب ٍ غدا مرهون لكفوفك
تعذبني كأنه بين قلبي و بين قلبك ثار !
امد ورود حبي لك و تستقبلها بسيوفك
تشوف الشوق حارقني .. و تتعمد تزيد النار
اقول لك شي .. اقتلني .. و كمّل فيني معروفك