وطن ضايع .. شعب يبكي .. مسحنا دمعة عيونه
فزعنا له .. وفا و اخلاص .. و كنا اكثر مْن اخوان
بعد رب الملا صرنا على غدر الزمن عونه
فتحنا قلبنا دار .. و لقا في دارنا احضان
شعب عالواجب تربى .. و من يومه تعرفونه
و من ينسى فضل زايد .. و بعده فضل بو سلطان
غريبه كيف كف ٍ جاد بعد خيره تعضونه !
و هل هذا جزا المعروف ؟ هل هذا جزا الإحسان ؟؟!!
غريبه كيف من يقصد بكم خير ٍ تجازونه
بفعل ٍ ما لقينا له اسم لايق سوا النكران !
عطوني لْفعلكم تبرير .. ابعرف وش تسمونه ؟
جهاد ٍ كيف يا عالم ؟ ولا يحمل شيم شجعان ؟
شجاعتكم دفنتوها في امس اللي تهابونه
عن اللي كان في عهده يقلد هتلر الألمان !
و جيتوا اليوم عالطاهر .. تعاونتوا تخطْفونه
بعد ما علّقت امه لعرسه زينه عالجدران ؟
كسرتوا قلبها اللين .. حرام اللي تسوونه
حرمتوها فرح ليلة زفاف اغلى و اعز انسان
حرام الشيب في بيته بعد فرحه تبكونه
حرام امه تشق الجيب و ينزل دمعها وديان
خذوني و اتركوا ناجي الخميس الجاي يزفونه
و تنزل دمعة الفرحه و نمسح دمعة الأحزان
ترى امه ما تذوق الزاد .. و تقضي الليل محزونه
ما تدري اذا مرتاح ولا يشتكي تعبان
ولا تدري اذا كنتوا تغدونه و تعشونه
ولا تدري اذا ف يومه يلاقي الماي اذا عطشان
علمنا يعطّر الدنيا اذا رفرف على هونه
سلام و خير يتغنى و تشهد للعلم الوان
شعبنا يرفعه عالي و من اقصى الكون يشوفونه
حمامة سلم من يومه ولا عاون على العدوان
عسى الله لا يسامحكم اذا بكلمه تهينونه
اماراتي ولد زايد عزيز و ما انولد ينهان
عسى الله لا يسامحكم اذا بلمسه تضرونه
اماراتي ولد زايد قوي الباس و الإيمان
ترى رب السما يغضب على اللي ما يخافونه
و لكن رحمته فيها كثير ابواب للغفران
اذا كان الأسر غلطه .. نناشدكم تفكونه
ترى ما فاتت التوبه .. ولكن وقتها قد حان
و اذا كان الهدف خطه وراها شي ترجونه
ولا تتنفذ و تنجح سوا بالجهل و العصيان
خذوني و اتركوا ناجي الخميس الجاي يزفونه
خذوني .. كلمة ٍ جابت قصيده ( كلها عنوان )