أول كـلامـي لا الـــه الا الله
رب البريـة خـالـق الأكـوانـي
يقول ابـن ثعلـي وهـاذي هديّتـه
هديتـي وأصلـي لهـا تبيـانـي
يانـاشـدٍ عـنّـي ولا تعرفـنـي
يكفيـك ماتسمـع مـن العنوانـي
أصلـي عتيبـيٍ عريـبٍ ساسـه
علـى ماقـال بديـوي الوقدانـي
يقولـهـا راع المـثـل قـدامـي
خيـار الدلايـل جـرة الفرسانـي
ربعي عتيبـه عـز منهـم ربعـه
ليا كظّـم البرطـم علـى النيبانـي
أعلـى قراياهـا الحجـاز علوهـا
وأسفـل منازلهـم ليـا الصمانـي
دولة هل العوجـا تحـت رايتهـم
سابق ولاحق من علـى الجدانـي
واليـوم قايدنـا العديـم الفيصـل
فيصل وفيصل حيـزب الرحمانـي
فيصل ولا فيصـل يسمـى غيـره
ضـد الضديـد مفـرق الخلانـي
لو الضديد مـن الحديـد ضلوعـه
ياطى على صلب الحديـد ولانـي
هو سيفنـا الباسـل وهـو رايتنـا
هو قصرنا الثابت على السيسانـي
ساسه على التوحيد والراي والضفر
والشرع وأحكامـه هـي البيبانـي
ولـد عديـمٍ ناجبـه مـن راسـه
مرحـوم ياهـاك العديـم الفانـي
عبدالعـزيـز الله يبـسّـط خــدّه
في روضة الجنه عسـاه أجنانـي
وعقّـب لنـا سربـة عيـالٍ مثلـه
والكل فيصـل والجميـع أخوانـي
من لابةٍ من ذخـره ابـوه وجـده
الاد مقـرن كلهـم مـن دانــي
تكاتفـوا فيـهـا بـشـد أبنـاهـا
ليـن استقـام السـاس والبنيانـي
والملـك واحـد والسعـد بيـد الله
الله يساعدهـم عـلـى الخـوانـي
ما تصفـق اليمنـا بـلا يسراهـا
ولايرتفـع طـيـرٍ بلاجنحـانـي
انـا اشهـد إنـا نفتخـر بملوكنـا
والله واللـي نــزل الفرقـانـي
حيـث أنهـم حكـم العدالـه فينـا
حكم العـدال وشوكـة الميزانـي
يـا عطفهـم يالطفهـم بضعوفنـا
نصر الضعيف ومتعـة الجيعانـي
واليا عوى ذيـبٍ لذيـب وحـاول
وردّ البـرى وأحتكـت العيدانـي
نلطم بهـم وجـه المعـادي عنّـا
كل ابلجٍ يصهل صهيـل أحصانـي
ينصون عنّـا المشكـلات الهامـه
ولهـم فعـولٍ ماضيـه برهـانـي
ولهـم تـاريـخ جـديـد ودارس
ولهـم بتاريـخ القـلـم ديـوانـي
حكامنـا مـنـا وحـنـا منـهـم
والكل في حكمـة عظيـم الشانـي
وهمّـه قوايدنـا وضـد أعـدانـا
وحنّا الصفوف وعسكـر الميدانـي
صفّوا صمود الراي دون أوطانهـم
عليـه مـن يـم الضديـد أمانـي
أوطانـنـا ياطامعـيـنٍ فـيـهـا
الهـا حـدود تحتـم الأوطـانـي
الحد مـن يـم الجنـوب الغربـي
تسعين كيلـو مـن ورى جيزانـي
والحد من يـم الجنـوب الشرقـي
لهـا الخليـج العربـي حـدانـي
منهـا الوديعـه حدنـا ونعـرفـه
وكـل يعرفـه لازمـى الغلطانـي
لنـا بتاريـخ الـزمـان السـابـق
ويبقـى بتاريخـه علـى ماكانـي
ومن شرق من حد الكويت وغرب
ومن الشمال الحـد مـن عمّانـي
هـاذي حـدود المملكـه ياجاهـل
يشعر بها فـي السـر والاعلانـي
يفهم بهـا القلـب اللبيـب الفاهـم
ويدري بهـا الصمـان والعميانـي
وحنا وراها مـن يمنهـا وشامهـا
واللي تهاون فـي الحـدود يهانـي
فيهـا مـن القـوات ماحاميـهـا
بـإيـرادة الله ثــم بالشجعـانـي
نـدرب الشبّـان ضــدٍ لمثلـهـم
ونقـابـل الشيـبـان بالشيبـانـي
ونجهـز القـوات ضـدٍ لغيرهـا
ونقـابـل النـيـران بالنيـرانـي
ونقابـل المسـوي بسـوء اعمالـه
ونقابـل الاحسـان بالاحسـانـي
يامـا لطمنـا دونهـا مـن عايـل
ليـا نزغتـه نزغـة الشيطـانـي
يـومٍ يجـي منـا وضـد أعدانـا
يغضب ابليس ويرضي الرحمانـي
مـن ذاق ضربتنـا النهـار الاول
والله ليقنـع فـي النهـار الثانـي
كم ساعـةٍ رفـرف علمنـا فيهـا
مستبشـرٍ بالنصـر والبهجـانـي
الله خلقنـا الهـا ومنهـا وفيـهـا
وحنا لهـا عـن ميلـة العدوانـي
جيـشٍ وقيـادة تـروسٍ جـنـوده
اللي لهـم حمـر البـدال اكفانـي
يـروس قيـادة شبـول ابطـالـه
مـن راي عبـدالله ليـا سلطانـي
عيال الملوك اللي علـى ديـن الله
هدامـة الاصـنـام والاوثـانـي
حنا علـى ديـن الرسـول محمـد
دستورنـا التوحـيـد والايمـانـي
وصفوة قريش اللي نزل بالطاعـه
نـزل عليـه الوحـي والقرانـي
هـذا وصلـى الله عليـه وسـلـم
افضل صلاتي وافضل الرضوانـي