هـذه قصيـده أهديهـا لأخــي العـزيـز
عـبـدالله بــن عـويـمـر السـلـمـي
ياعبدالله ماباقي بالزمن شـيٍ يسـر الحـال
تغير كل شي وصارت الدنيـا شكـل ثانـي
طغى فيها النفاق وصار فيروسٍ مع الأجيـال
وبيت الكذب فيها والخيانـه والغـدر بانـي
وكثر فيها الحسد والظلم والغيبه وقيل وقـال
غدت بين البشر تلك الصفات أشكال والواني
وضاع الصدق منها والوفاء ماعاد له منـزال
وفقد الصدق طبعاً والوفاء من ضعف الإيماني
تشوف الرجل قدامك غريب وله كثير أشكال
يجيلك يوم ياطيبه ويـوم يجيـك شيطانـي
لكن أوصيك بالدنيا تجنب صحبـة الأنـذال
ترا الأنذال نـاسٍ مالهـم ميثـاق عدوانـي
صداقتهم صداقة مصلحه منصب وجاه ومـال
يغرونك بحسن أسلوبهم والضحـك مجانـي
ولو عكر زمانك باعوا العشره بربع أريـال
هذا طبع النذل خاين مع أصحابه وقومانـي
فحتى لو يكون من القرايب عـم وألا خـال
فلا تتبع طريقه قول لك شأنك ولـي شأنـي
وعليك بصحبة اللي فاللقاء تضرب به الأمثال
مواقيفه على عز وشرف وعلومـه أسمانـي
إذا جت سيرته كلٍ يقـول ونعـم بالرجـال
تشرف سمعته في مجلس الأقصين والدانـي
كذلك لو نخيته جاك سيـفٍِ صيرمـي قتـال
يجيك وأنت فالمضحاه لو هو صوب نجراني
يقف جنبك بجهده في لزومك وقفت الأبطـال
يقول أبشر بعزك لا يهمـك منـت وحدانـي
صداقات الرجال الوافيه بيـت وذرا وظـلال
ولاهي مشكله لو كان تشرى بأغلا الأثمانـي
نصيحه لك من اللي جرب الدنيا بغير جـدال
أبوي اللي بعرفة طيبيـن الأصـل وصانـي
أنا ياما تحديت الزمان وشفت فيـه أهـوال
لكني ما تجاهل مجد أبـوي ومجـد جدانـي
أسير بدرب جداني هل الوقفـات والأفعـال
هذا فارس وذا عبدالعزيـز وذاك ضيدانـي
وعن منهاج أبوي وسكته مأخذت لي محوال
ولا أعثر فالطريق اللي عليه أبـوي مشانـي
هو اللي بأسمه أفخر بين هالعالم وراسي طال
أنـا لأشـي لـولا الله ثـم أبـو عتقـانـي
من أيام الطفولـه للشبـاب لوقتنـا مـازال
يغطيني بعطف وعن سموم القيض يحمانـي
أقبل جبهتـه وأقبـل إيدينـه بكـل إجـلال
وفي قربه رعـاه الله تبـدد كـل الأحزانـي
وأبي تفهم إذا لاقيت فالأصحاب بعض إهمال
تذكر ذا الكلام وقول إبـن عتقـان وصانـي
بواسطة:عبدالرحمن السلمي