مـرت عليـه يالعتيبـي ليـالـي
وأيام يامـازن عِجـاف وغريبـه
وأجهتهـا وأنـا وحيـدٍ لحـالـي
وأستبسلت ضـدي بقـوه عجيبـه
الطرف يسهر دوم والفكر خالـي
والقلب توقـد فيـه نـارٍ لهيبـه
صابر على جور الحمول الثقالـي
ماقلت هـذا صاحبـي وأعتزيبـه
أضحك وأجامل مع بعيد وموالـي
واللي بوسط الجوف محدٍ دريبـه
والان وضعي صار جـداً خيالـي
وصارت حياتي يالعتيبي صعيبـه
الدمع عندي كان بالحيـل غالـي
واليوم من عينـي تزايـد سكيبـه
زادت همومي من كثر ماجرالـي
وجروح قلبي يالسنافـي عطيبـه
جرحٍ خفيف وصاحبه مـا يبالـي
وجرحٍ خطير وفيه يعجز طبيبـه
وأهـم جـرحٍ مايبيلـه جـدالـي
جرح الحبيب اللي تجاهل حبيبـه
وأنا أدري إن الوقت صعب المنالي
والشخص لابده يحصـل نصيبـه
لكن شـيٍ مـن حبيبـي جرالـي
مصيبـةٍ ياكبرهـا مـن مصيبـه
بواسطة:عبدالرحمن السلمي