الله يسامـح رمـوش عيونـك الخجـلا
ياللي طعنتي الخفوق وسالـت اشعـاري
وش في يدين الليالي ترتعـش وجـلا ؟
ولا جبت طاريك قالت حي ذا الطـاري !!
مـع السحـاب ارحلـي والله مـا يسـلا
غريـب دارٍ يخيـل البـارق الـسـاري
وان كان عيني على الحاجب نوت تعـلا
طعنت وجه الجـروح بخنجـر اشـواري
روحي مع الريح جرحك يا مـلاك اغـلا
..جرحٍ .. غرس مخلبه في ثوب مشواري
ومـادام طعنـة زمانـي مانـوت تجـلا
اسألك عن ويش يا وقتي وانـا عـاري!
عن ثوبي اللـي تقطـع قبـل مـا يبـلا
والا عن البندق اللي ما خـذت ثـاري !!
او مهرة اقبلـت تركـض وهـي عجـلا
اخيلهـا بـس لا بـايـع ولا شــاري
يوم استدارت وسـارت وانحنـت خجـلا
أشعلت نـار القصيـد وتاهـت افكـاري