انا راس مالي حلم ليـل ينـادي النـور
رحل في الوسيعه مادري وينهو غـادي
زرعت الحقيقة واثمرت في رمال الزور..
جروحٍ تنازف وابتهـج وجـه حسـادي
(عليك الهبا) مشيت لك يا زمن مجبـور
وأنا اللي ورثت السيف الابتر من اجدادي
من طويق ردتني الليالي لـوادي الغـور
وأنا هقوتي ان ابقى على هامتـه بـادي
ولا عدت اميز مجهم النوق بين الخـور
تساوت بعيني دمعـة الحـزن واعيـادي
اسوج الصحاري والصحاري بعيني بـور
ولا اشم في ذعذاعهـا ريحـة الكـادي
طريقي مع طوله بعـد ضيـقٍ مهجـور
تسوق القدم له دمعة الشـوق وعنـادي
ونقشٍ لقيته في صميم الحشـا محفـور
تغنّي به الضلـع العـوج يـوم ميـلادي
هو الاول الباقي هو الظاهـر المستـور
هو الحاضر الغايب وانا الثايـر الهـادي
ياما كتبت اسمه على الرمل دون شعـور
وانا دمعة عيوني علـى الخـد تنقـادي
وياما بنيـت بنايفـات الجبـال قصـور
وضاعت علي بيبانهـا وقـت ميعـادي
تطول السوالف في الهوى والبحور بحور
وبعض المراكب ما اعتبر سيرها عـادي
ازيد الحذر من قبل ياتـي علـي الـدور
واخاف المحيط اللـي يسمونـه الهـادي
ولو يستوي في عيني الليل هو والنـور
حرام علي ما اساوي طويـق بالـوادي