تجمّل يازمن واضحك بوجه التايه المحروم
خذيت اللي خذيته وش بقى وبتاخذه ثاني
هنا وسط الحشا في داخلي كان الغلا مرسوم
ترعرع داخل القلب الرهيف الطيب الحاني
هديته صادق الاحساس في عقد الوفا منظوم
حفظته داخل القلب وحضنته وسط الاعياني
سقى الله ليلة البارح هواها يشفي المهموم
سَرت بأفكاري لذكرى الحبيب اللي تمناني
بعدماراحت ايامه بقابي حزني المكتوم
تمنيته يجي ويشوف كيف اغيابه اشقاني
زمان الغدر ارهقني حرمني من لذيذ النوم
زمانن يحرق الفرحة يجدد نار وجداني
واذا دارت دواليب الزمن ياقلبي المضيوم
وتهت بزحمة الدنيا وتاهت عني اوطاني
ارد لمصحفي وسجادتي واقول ذا المقسوم
هو اللي ماخذن مني وهو سبحانه اعطاني
