يابنت روقي وخلي خاطـري يسـلا
ماهوب وقت الدموع ارجوك فكينـي
خليني اسلا بشوف عيونـك النجـلا
واهيم في سحر ذاك الرمش والعيني
زودٍ على ماحوت من سحرها خجلا
والرمش يغضي على الوجنات بهويني
كل المشاعر تجي في شوفها وجـلا
تذوب فالعشـق ياعشقـي وتشقينـي
سودٍ على القلب تسطي ماتبي كحـلا
من خلق ربي حواها الكحل والزينـي
لاخالط الرمش بيض الخد يا ماأحـلا
شي اشوفه ولا احـد بـه يجارينـي
هذا علاج القلـوب وكـل مايجلـى
هـم تمكـن بقلبـي فـوق عامينـي
والفكـر مايهتنـي والقلـب مايسـلا
الا بشوفـة عيـونٍ سلهمـت فينـي