ياشاعر الوديان معنى قصيدتك

لـ زيد بن فيحان الكريزي، ، في غير مُحدد، آخر تحديث

ياشاعر الوديان معنى قصيدتك - زيد بن فيحان الكريزي

الشاعر
ابن جرشان

يازيد بن فيحان مالحقنا شك
بطيبك وطيب جدودك الأوليني

لكن أحب أمزح وأحب أتحكك
حكة شرف ماهي بحكة بطيني

أنتم خذيتوا يوم رد البرا صك
بعكف السيوف وصاطيات اليديني

واليوم كان الخبل فالطيب شارك
وقت الرخى مثل اليسار اليميني

رد الشاعر
زيد بن فيحان

ياشاعر الوديان معنى قصيدتك
ينطق عن أحداث الدهر والسنيني

أحسن ظنونك لاتشك بعقيدتك
والسلم يامسلم على المسلميني

وليا حصل يومٍ تنومس بعزوتك
حنا سلايل ربعك الأوليني

طيبٍ يكمل طيب فعلك وقالتك
يابو سعد يامكرم المختطيني

من سلم جدانك وميزة جماعتك
قيف الدخيل وتكعم المعتديني

وقت مضى يوم اللقى والمعارك
وصور الغروس ومقرعات الحيني

من دون غرسٍ شقر وسهاف أو أرك
ياما أيتموا برماحهم من جنيني

والنمر يخر نمر لايلحقك شك
والذئب مايخر بزربه حصيني

فينا كما الماضين وأدون وأبرك
ولال الحقد مدخال بينك وبيني

واليوم حزة حمد والخصم رافقك
والله يعز ملوكنا الطيبيني

تمت بجاه الله وأنا أقول حشمتك
تاج على رأسي وخشمي وعيني

© 2024 - موقع الشعر