دخول | تسجيل


السنحان

لشاعر يوسف السناح | بواسطة يوسف السناح | اخرى | | المشاهدات 685


التقييم 2.5/5
الشاعر يوسف السناح
يستاهل التكريم شيخ المواقيف
نايف وريث اهل السيوف الشطيره
ماله حلي الا السيوف المراهيف
لاقام صوت الحرب يدوي صفيره
وسلايل دويلان من دون تعريف
شيوخنا يوم الاسامي شهيره
ورث لهم عرف الرجال العواريف
قاضي قضاه وسيرته خير سيره
وبدر لامن عدوا وصوف التعاريف
من الرجال اللي تقود المسيره
ماشال هم الوقت والا الصواديف
يقدم ليا شاف الجيوش المغيره
وحراب صيته فآق كل التواصيف
كريم مايقصر عن الناس خيره
شاعر ووظف كلمة الشعر توظيف
وقصايده بوصوفها مستنيره
ومويس لجله نرفع الصوت ونضيف
اسمه ظهر يوم الليالي عسيره
كيف ابتدي في سيرته وانتهي كيف
وفعايله للمدح صارت سفيره
ورزيق بن سمران له بيرق وسيف
و الصيت كايف والمواقف كثيره
حقايقً بالحق ماهي تخاريف
الساس ثابت والرحا مستديره
واليوم ابو خالد على العز والكيف
يجدد امجاد العقول البصيره
ترفع له الرايه معزه وتشريف
الشك زايل والهقاوي كبيره
المدح مركب والفعايل مجاديف
وايامنا مثل البحور الغزيره
وابن مطر كساب طيب ومعاريف
رزقان تشهد له جميع العشيره
من شاف فعله ماتجيه التحاسيف
حكيم راي وكلنا نستشيره
وربعي عيال سناح ربع ومواليف
ورجالهم للمجد يشعب بعيره
اهل الوفا والطيب والرمح والسيف
يوم المعارك بالسيوف الشطيره
فعايلً ماهي علوم وسواليف
من طيبها نفخر بها بكل ديره
ومواقف الابطال من دون تحريف
يشهد لها التاريخ وارض الجزيره
من دون قاصر مابها شكه وزيف
كلن معه في قمة العز سيره
شاعر وماجيت انطق بشي ماشيف
والصدق مانبغى من الناس غيره
وفي دولة الاسلام مابه تخاليف
مدام صار الدار بامن وستيره
ولو يشتكون الناس جور المصاريف
الما الحلو ماودك ايهد بيره
الله يكافيها شرور الصواديف
دارن لها في داخل القلب ديره



تبليغ عن مشكلة في القصيدة