"بعض الرجال" - مفرح الضمني

بعض الرجال مزمغدن كنه الفيل
في دكته يبي النشاما تجي له

جاه رمضان وخيره بالمواكيل
خبل ملا بطنه ونفسه ثقيله

مامن حلا لو حط فرش ومعاميل
متساوين قدره وقدر الحليله

هذاك مالي يم بيته مداهيل
لاهو عميل لي ولاني عميله

انا رفيقن للرجال المشاكيل
اللي مواقفهم مواقف جميله

وقت اللزوم بحزة العسر والميل
كلن ثقيل الحمل عني يشيله

ورفيقي اللي طلعته طلعت سهيل
يستاهل اللي من بعيد يعني له

رجل يعزونه خيار الرجاجيل
من حشمته تحشم ضعوف القبيله

***
© 2024 - موقع الشعر