يامن يخبرني - عبدالعزيز السعود الصباح

يامن يخبرني عن الحق وينه
هو مات والا من طغى الناس هايم

اسأل وما القى أحد استعينه
عنده جواب يطمن البال دايم

والحق بس يذكر ولا شايفينه
حرفين نسمعها من الناس دايم

لو كان به حق تبيّن ابحينه
في عالم كلّه ذنوب وجرايم

اما الصحيح وكلّنا عارفينه
الحق للقوّه وذا له علايم

كم حقٍ راح ومالقى من يعينه
والزور بالقوّه يحوز الغنايم

وانا عرفت أهل الحسد والضغينه
اللي يحبون الفتن والشتايم

وشرايكم يا اهل العقول الرصينه
هل تسمحوا لي ذكرهم في قوايم

ليش استفزوا غيرهم تاهمينه
ما فكروا باوضاعهم والهزايم

واللي يصير بمالهم مشترينه
مايرفضون بسوقهم كل سايم

قالوا تصبر والصبر ذاكرينه
قلت الصبر دايم يهد العزايم

والمقتدر يفعل وتاصل يمينه
مابه صبر الا اذا كان شايم

دنيا تدور ولا تحب السكينه
تاطا على درب السهل والعدايم

لو دامت الدنيا على حال زينه
ماصار فيها من هموم وظلايم

احدٍ يعاف الزاد نفسه حزينه
واحدٍ من الفرحه يقيم الولايم

واحدٍ بأطماعه يدنّس يدينه
دايم بتفكيره على السطح عايم

يبلغ ومايشبع وحاله زبينه
ملهوف مايرتاح قاعد وقايم

كم جاهل تاتيه فرصه ثمينه
ويفوز من حظه بما كان رايم

وكم عالم امضى حلاوة سنينه
بحث ودراسه لكن الحظ نايم

قد يظفر الثعلب بصيده سمينه
يشبع ويرقد في ظلال الصرايم

او ربما جاع الأسد في عرينه
بعد السمينه ما ظفر بالهلايم

والجود اللي يشتهر فيه زينه
حيث الكرم هو والمراجل توايم

سبحان من انعم علينا بدينه
حتى اجعله فينا قوي الدعايم

بعض الأوادم له نوايا لعينه
ودّه على موتك تقام المآتم

يلقاك لي شفته بنفسٍ وطينه
يفرح كما يفرح على الفطر صايم

ويضم في صدره امورٍ دفينه
يضحك وقلبه أسود اللون عاتم

وهو بظنّه يخدعك في يقينه
ولا درى انه به الشك قايم

يامن يخبرني عن الحق وينه
هو مات والا من طغى الناس هايم

تمت الإضافة بواسطة : سالم ال فروان
© 2024 - موقع الشعر