سر يا قلم واكتب خطاوي اسنيني =باصوغها للناس بيتٍ ورا بيت
افرّح قلوبٍ قرت فرح فينى =وابكّي اعيونٍ إلا منى ونيت
اسرج خيولٍ على كارهينى =وارتب ورودٍ إلا مني حبيت
اهتّك استار الخيانه بيديني =وافتح اغلاقٍ إلا منى غنيت
خلك مطيعٍ يا قلم لا تعصيني =كل كلمةٍ خطيتها لك بها صيت
شعري أبد ما فيه حرفٍ يشيني =أنا لجيت أكتب تخيّرت ونقّيت
سر يا قلم واشعل حسد حاسديني =كلما طفت أنوارهم شب لي ليت
شعري حويته مدري هو محتويني =كلما هتف في داخلي قمت ولبيت
مر أنتخيه ومر اهو ينتخيني =ما قط خلف موعد وإذا عن لي جيت
أنا احمد الله ما توطّى جبيني =إلغير ربي خالقي ما توطيت
أخطي ولكني امتمسك بديني =واستغفر الله زلتي كل ما اخطيت
من صد عن دربي فلا يحتريني =ومنهو عنا لي بالمثل له تعنيت
ومن مد لي يمنى يلاقي يميني =عهد الوفا في مدتي يوم مديت
أشد وأرخي واقسى مرٍ وأليني =اقبل وأواجه وإن ضعف خصمي صديت
أحذر وأنا أدري ما قسم يب يجيني =مؤمن ولكني بشر لو تعليت
والغيمه اللي ما امطرت لي في حيني =ما اقول لا عدت حسافه ويا ليت
اطمح وحتفي عارفٍ مقتفيني =الله فرق ما بين حيىٍ مع ميت
اسعى في رزقي وادري ربي ضميني =ما يوم عن بذل السبايب تراخيت
والكلمه اللي بين واحد وبيني =ما ابوح فيها لوني حتى تأذيت
والمسألة اللى أبد ما تعنيني =ما خضت فيها ولا لها يومٍ أصغيت
بحار وعيّت ترسي يومٍ سفيني =كلما وصلت لغايةٍ لاخرى عليت
عجلٍ في حاجة صاحبي تلتقيني =وإن صار لي عنده حوايج تباطيت
راضي أنا في كل زيني وشيني =ما قط أبد عن نفسي يومٍ تشكيت
هات الورق بامضي شهادة يقيني =شهادةٍ ما دونها شيىٍ أخفيت
والخاتمه يالله عساك تحميني =من عاقبة ذنبي إذا ما توفيت
وبرحمتك يا ربي لك تجتبيني =من قلب مؤمن ارتجيتك وناديت