راكب اللي تو ورد مـن قراشـه=وارد الفكسار مـن تالـي مديلـه

أبيضن لونـه وداخلتـه بشاشـه=فيه من وصف الذهب حلياً جميله

كن تمثاله اليااقبـل كـاب باشـه=وكن زيكه سلة السيف الصقيلـه

ماشراه اللي يقاصد مـن معاشـه=الفقيـر اللـي محاصيلـه قليلـه

مشتراه من الوكيل بسلـم كاشـه=طالبه بمواصفاتـه مـن وكيلـه

ينتهض مثل النداوي في انتعاشه=يوم فر دريولـه بالتـرس ويلـه

كن جلـده فالحتيفـه واجتواشـه=جلد ثعلن فـي مقاديـم المخيلـه

ثعل ندراً سيلها يسبـق رشاشـه=هل زخـات البـرد قـدام سيلـه

منوة اللي مادخل قلبـه هشاشـه=ماتهمه طرقتـه لوهـي طويلـه

فوق ركن المرتبه طاون فراشـه=وان بغى له طرقتن مانـام ليلـه

يوم نور الصبح باين له غباشـه=من عفيف مسرحـه والله كفيلـه

مع طريقن ماتعرض له عكاشـه=كن خطه قدم وجهه ينطـوي لـه

يطوي الاميال قدمه طـي شاشـه=مايهس عن آخر الارقـام ميلـه

وان نزل عن سرعته بالرجل ناشه=كن فوق الارض جنحانن تشيلـه

ناوياً عقب الصلـف والاندهاشـه=عند ابو فواز فـي جـده مقيلـه

شيخنا اللي كل فعل الطيب حاشه=ينحسب به فاللزوم وينعنـي لـه

من نصاه تزول عنه هموم جاشه=تنجلي عنه الهمـوم المستحيلـه

الشحم والعود الازرق والنعاشـه=والقناد اللي يداوى الراس هيلـه

والشجاعه والبراعـه والبشاشـه=والمقام اللي محله يستـوي لـه

كل ماجاء موقفن صعبن نقاشـه=دون ربعه كل حملن يرتكـي لـه

وان وقف حبل الشقا وازداد طاشه=ياطر الروس الصعاب وترتخي له

لابسن ثوب الشرف مابه عباشـه=ناهجن منهـاج حاميـن الدبيلـه

يوم دقـلات السبايـا والطناشـه=والزنـاد مولعـن راس الفتيلـه

وردو عمهوج لين اروو عطاشـه=في جموع الترك سطواته مهيلـه

في زمانن ماضي الاسلاف عاشه=خلدو للمجـد صفحاتـن جليلـه

والثلاث البيض فازبهـا عكاشـه=ماذكرت مـن الكثيـر الا قليلـه