يا الله يا منشي من الغيث دفاق = برقه يلوح وساري له تخافيق
مترادف متكانف نوه اطباق = عليه ربان البوادي مشافيق سيله جديد من العلاوي له اعناق = ضيق محانيب العجام الصعافيق سبتين والثالث له اشكال وارناق = يا زين ريضانه وريح الزماليق شبه الجزيرة ساقها وابله ساق = من باب صنعا إلى قرى الشام غديق وسم وربيع وصيف غداق غداق = نبته عميم ما تشوف الطواريق كل عطاه الله على شفه وراق = بعض المرابع جا على الحول ماذيق يفرح بها الشاوي ويفرح راعي الناق = وراعي الفلاحه غير سانه مواريق ارزاق مخلوق على كف خلاق = جزل العطا وابواب غيره مغاليق يا الله يا اللي في خفا خاطري وارق = يا الواحد اللي تفرج الهم والضيق افتح لنا من عندك ابواب الارزاق = وابرج لحي دون حريته عيق وعن حر نار لشعلتها تذلاق = جرنا لياما التفت السيق بالسيق هنيت للي بالجناحين خفاق = حر يحلق في سما الجو تحليق يغبش على فاله تغابيش تفاق = وعين الحسد ما حدقت فيه تحديق رزقه خلا ما هو بزحمات الاسواق = ولا عليه من الخطيات تبريق بعد التجارب يا ملا خاطري فاق = وعرفت وضعي بين مرزوق ورزيق وحوادث الدنيا جديدات وعتاق = منها تشكووا مبعدين الملاحيق اليوم صار المجتمع كيد وشقاق = حقيقة ما هي ضنون وتواهيق شفت وعرفت وعفت بعد التحقاق = تصرفات تحرق الدم تحريق كفوا وعفوا من كثير التشداق = يا اللي لكم في معرض ابليس تسويق سيروا على منهج عريبين الاعراق = اللي مواقفهم ورا مرتع النيق اهل البيوت اللي لها ظل واشناق = من لاذ فيها يشكي الضيم ما بيق ريف النضا ولجارهم ستر ورواق = اهل السلوم مكملة كل ما ليق لا صلاح ذات البين عجلين واحذاق = لا سيق فنجال الدلال الغرانيق شمس التجارب نورها يشرق اشراق = ومن يومها نسقت مبداي تنسيق ما نيب من خيله على الغايب سباق = القول عقب ملاحظات وتدقيق حبل الموده بين الاجواد ميثاق = واهل الوفا ما يقطعون المواثيق يا الله يا اللي تعتق عبادك اعتاق = حظ الشلي لا تجعله في تماحيق ويا الله عسى من لامني كيد وانفاق = يسوقه الله في طريق المطافيق يمسي وهو مبسوط في جو عشاق = وتصبحه بقعا على فكة الريق |
||||||
| vists | copyrights slogon | online crap |