حب المزاييــن

خلاص عن حب المزايين هونت
خلاص مابي حبهم لو يجوني

ياما لسواد عيونهم هنت وأنهنت
وبأسبابهم صار البكاء من فنوني

وهبتهم كل المشاعر وأعلنت
أني لهم خادم على ما بغوني

وفيت وأخلصت و صبرت و تعاونت
بذلت مالي لجلهم وتركوني

أعطيت وماأذكر عليهم تمنّنت
حققت أمانيهم وما يطلبوني

ذكرتهم بأبيات شعري و دوّنت
أحلى القصيد بوصفهم وجحدوني

لا شفتهم قدّام عيني تطمّنت
ولا غاب أحدهم زاد فيني جنوني

أهملت نفسي وبدلعهم تفنّنت
وأسكنتهم في خافقي , في عيوني

صرت لمشاكلهم طبيب ٍ وأدمنت
على هواهم والغلا , ثم نسوني

صبرت وواجهت التغلي ولا لِنت
مع من يزعلهم وهم زعّلوني

رفعتهم عند الملا وما تبيّنت
نسيت قدري لين ماهم كووني

حبيتهم من كل قلبي وآمنت
أن الحياة بدون حب ٍ تهوني

ومع زود حبي والوله ما تمكنت
أني مثل مانا أبيهم يبوني

من بعد ماني زين فعيونهم شنت
ومن بعد ما كنت الحبيب كرهوني

صرت أتبع المقفين من بعد ما كنت
أنا الذي لا رحت هم يتبعوني