جيت للدعوه وارحب بالنيابه=عن هل المركز نهلي بإنشراحه

مرحبا بشيوخنا مقدم عتابه=عد ما نبت الزهر في كل واحه

كن مزن الغيث غاشينا سحابه=يا هلا بقدومهم قول الصراحه

مرحبا بمحافظ المهد وهلا به=من رجال الدين ورجال السماحه

في وجيه أهل الكرم ما صك بابه=كافح الفتنه ومعروف كفاحه

مرحبا بضيوفنا من كل لابه=هانت الرحله بعد طول المساحه

من حضر من كل ديره مرحبا به=من لفا المركز وشارك بفتتاحه

نشكر الله ثم نشكر من سعابه=وحقق المركز بجهده وإقتراحه

ديرةٍ كانت تعيش بها الذيابه=موحشه ما فيه أمان وماش راحه

الجهل والعلم كانت بالمجابه=وانتصار الحق فيها من فلاحه

تسمع المذن بدل صوت الربابه=وتسمع القرآن في ليل وصباحه

اعمروها أهل الكرم ربع وقرابه=كل واحد حط فله واستراحه

والمساجد والمدارس لا غرابه=عامره من عقب ما كانت براحه

جابها شارع بعد ما اتعب ركابه=الله اللي وفقه واتمم نجاحه

في ذرى حكم السعود اهل المهابه=فضلهم كل الوطن يلبس وشاحه

احمد الباري ماخذناها نهابه=جاتنا بالجهد والطرق المباحه

احمد الله وأشكره في كل جابه=راح وقت الظلم لا رحتوا مراحه

في شفاء نجد الجميل وفي هضابه=عندنا أبها نجد عاصمة السياحه