سلط على اللي سببوا كلمة أفراق=واهدافهم تشتيت عاشق ومعشوق
ماخافوا اللـي للمخاليـق رزاق=خلوا شعور الحب بالجوف محروق
ياليتهم يدرون في قلبـي أشـواق=منها السحايب هلت الدمع ببروق
ومنها كلامٍ تشهده بيض الأوراق=ذكرى سنين العمر بكتاب مشقوق
لو واحدٍ منهم بكأس الهـوى ذاق=ماصار لي دربٍ طويـلٍ ومخنـوق
ياما تعذب من هوى البيض عشاق=وأنا ضحية من علت كلمته فوق
من بعد ما حظي مع الركب سباق=تغيرت الأحوال وأصبحت مسبوق
ياصاح مانـي للمقاديـر سـواق=حال القدر بفراق ياواهج الشوق
مكتوب لي فرقاك والقلب ماطاق=لاشك حكم الله فوق الملا طـوق
يكفيك جرح ألآه ينزف بالأعماق=ويكفيك خدٍ صار بالدمع ممشوق
يا ماحلا النسيان لو كان سـراق=ويا ماحلا المرباع في مرتع النـوق
عسى مع السلوان بتشيلني الساق=وأقدر أعيش أيام عمري ولو بوق
هني من هو تالـي الليـل مافـاق=ولا لواه من الهواجيس طـاروق
ولا لفاه الطيف في ساعة اخنـاق=مرتاح بالٍ ماعرف حب مخلـوق