حسين خميس آل علي - واختار حد غيري يسلّيه

دار الفكر في بدع الأمثال
والقلب هاض بكل ما فيه
قمت أرتِب أمثالي والأقوال
وأحدّد بقولي معانيه
وأخص به محمود الأخصال
من دون غيره قمت وأعنيه
الشيخ جاسم ذرب الأفعال
فعله سبق قوله وطاريه
نسل النشاما سيد لرجال
ربي عسى يصونه ويحميه
لي من لفيته واسع البال
تلقاه ويرحّب بلافيه
له بشتكي من حلو لجبال
من طول هجرانه وتجافيه
يا شيخ حبّه غثبر الحال
والشوق حلّت بي بلاويه
خلّي تغيّر عنّي ومال
واختار حد غيري يسلّيه
ونّيت ما بي نقص من مال
لكن من خلّي وتجنّيه
يا شيخ دونه سيح ورمال
وحسود تمنعني ألاقيه
دونه بعد لو حال ما حال
والله ما أقدر أخلّيه
خايف عليه القيل والقال
يا غير بالهاتف أحاكيه
يشبه عويد الموز ميّال
إن هبّت الشرتا تزاغيه
من لحظ عينه يرمي نبال
وتصوّب العشّاق عينيه
والخد كنّه برق شعّال
والثغر عوقي والدواء فيه
والريج صافي عذب سلسال
إذا سقى الميّت بيحييه
والعنق مثل الريم يفّال
والصدر كالبلّور صافيه
ما شفت في الدنيا له أمثال
ما حد في حسنه يباهيه
يا شيخ صدّه والهجر طال
يالس ومتريّي وأحاتيه
يا كم نحنا عنّه نسال
ونقول لي سوّاه يكفيه
دمعي على الخدّين سيّال
أسهر طوال الليل وأليعه
من كثر شوقي صابني خبال
والحب ما ينلام راعيه
ما طعت فيه لقول عذّال
لو ما حصل أهواه وأبغيه
حرف أربعين وظبي ختّال
سبعه وذيبٍ في مفاليه
يالله بودق يبات هطّال
يسقي الفلي والذيد يسقيه
لين العشب ينبت بالأشكال
والماي يجري في مغانيه
وإيّي حبيب القلب يختال
في مشيته محّد حواليه
وأهنأ بشوفة زاكي الخال
ويريحني ممّا أقاسيه
صلّوا على المبعوث والآل
ما غرّد البلبل بأغانيه