طلال هات الطـرس واكتـب بتبيـان
رداً علـى الشاعـر ونظمـه وقيلـه
لو كان مالي بـه لـزوم و لا شـأن
لكن أبا أنصـح صاحبـي واستميلـه
نصيحة مـا أبغـا جزاهـا بالأثمـان
حشـى حشـا لله مـا أبغـا بديـلـه
يا نجر ما أنت أبا الجلاد ا شويمـان
شاعر عتيبـه فـي زمانـه و جيلـه
سمعت يا نجر العصيمـي بالأعـلان
بأعلانـك بقريـة عصيـل ومسيلـه
وزعت لـك بلـدان وحـددت بلـدان
كنـك كبيـر الـقـوم وإلا و كيـلـه
ترمي بها يا نجر مـن دون ميـزان
رميـة عيـل وإلا خدعـك الدليـلـه
وإن كانهـا يـا نجـر زلـة لسـان
عود لـدرب الحـق واسلـك سبيلـه
يا نجـر مـا أسبـك ولا أذم عيـدان
ولا لي على ذمـك طريـق و سيلـه
أنته حفيـد اللـي يسمـى شحيمـان
ومزبـوره الشاهـد لجـوده وكيلـه
ومدح بليا فعـل يـا نجـر نقصـان
ومن ينخـدع للمـدح واعزتـي لـه
بعض المدح مثـل المذمـه وبهتـان
ما يشفي أمـراض القلـوب العليلـه
وبالنسبـه لعيـدان وأمثـال عيـدان
ما له علـى الحييـن زود و فضيلـه
مفروض مدحك للحمر و ابو حمـدان
ورشيد وانـداده ومـن ينتمـي لـه
وخليف ومجري ومذكـر و رشـدان
ذوي مطيـر الاربعـه عـن قبيـلـه
ومضيف العوشـز ونزلـه وقبـلان
وثالثهـم مسيمـيـر راع الكحيـلـه
وصطـام وعزيـز مذاخيـر نجـران
وهـزاع شيـال الحمـول الثقيـلـة
صحح مفاهيمك ورح لابـن شرفـان
يخبرك بدقـاق الخبـر مـع جليلـه
وأنشد كبار القوم عن كـل مـا كـان
والشيخ ابـن فاهـد حكيـم القبيلـه
خل المدح يا نجـر لاطـوال الايمـان
أهل الكرم وأهـل المهـار الأصيلـه
ما دمت شاعر والك بالشعـر ديـوان
حكـم ضميـرك واتـرك المستيحلـه
الديرة اللي بيـن صبحـا وعـروان
دار الشيـوخ ودار كــل القبيـلـه
مـا هـي بـدار فـلان والا فلنتـان
دار الرجـال اللـي خطاهـم طويلـه
ذخر جلوي وفنيتخ وذخـر شجعـان
الاد عـاصـم كاسبـيـن النفيـلـه
يا نجر قطمان المحـازم لهـم شـأن
أيمانهـم بالمـد مـا هـي بخيـلـه
ربع لهم صولات وأسنـان و عنـان
أهل الوفا وأهـل البيـوت الضليلـه
حمو حماها يـوم روغـات الأذهـان
بمشـوكٍ رأس المـعـادي يزيـلـه
حامينها يا نجر من مـاض الأزمـان
برماحهـم والمرهـفـات الصقيـلـة
زمل المناخ إلى غشـا الجـو دخـان
يثنـون مـن دون الحلـل والحليلـه
حامينها من وقت طلمـس ومشعـان
أهل البخت وأهـل الفعـول الجليلـه
يا نجـر لا تجهـل سلايـل سليمـان
هاذي مرابع جيـش طلمـس وخيلـه
و عبدالله ومطلق دواهـي وشيخـان
يشهـد لهـم شريـف مكـة وجيلـه
وشيخ المظاهيـر المسمـى كحيـلان
إلى اعتلا من فـوق بنـت الأصيلـه
محيميد مروي شذرة السيف والـزان
حمايهـم مـن كـل عيلـه وميـلـه
ومزيد وزيد اللي يفكـون الأضعـان
حمايـة الساقـة نـهـار الدبيـلـه
أخوان هيا أخبارهـم عنـد قحطـان
مفرقـة حبـل الخلـيـل وخليـلـه
بالحرمليـه فعـل أبـو مرحبـا بـان
جنـدل عقيـد القـوم واقتـاد خيلـه
وفعله على عرجا وفعل بن صدغـان
علـى جبـا عرجـا وجـال الثميلـه
أقتـادوا العطفـة وهانـوا صنيتـان
للشيخ بـن هنـدي زعيـم القبيلـه
وجزا عقيـد القـوم بايـام الاكـوان
لا هـوا بسيفـه مـا يعالـج قتيلـه
هذال يشهد له وخيـل بـن سفـران
صويبه إلى طـاح مـا أحـدٍ يشيلـه
ابـا العـلا جـزا يلقـب بقشـعـان
قصار ربعـه بالوغـى تلتجـي لـه
وكون الرشاويه ذبـح فيـه دوشـان
من سيف نايف ماش نايـف مثيلـه
ومن بعدهـم تسلـم الـرأي سلطـان
حلحيـل بأفكـاره وعزمـه و حيلـه
كافح مع بن سعود من ضمن الأخوان
وحصل مراده باسـم سمـو القبيلـه
والاد عاصم شاركـوا فـي رمـادان
بجمع رهيـبٍ مثـل نـوء المخيلـه
وحماية البيـرق علـى راس زبـدان
وجمع اليا ثـار العـدو يرتكـي لـه
وشديد الحثـري ظهـر فعلـه وبـان
بالمارتيـن اللـي تقـص الحبيـلـه
أخذ الركايـب والأشـده والأرسـان
والركـب جـدع رؤسهـم بالمسيلـه
ومحسن وحاسن كل الاثنين فرسـان
يـردون يـوم أن المـوارد قليـلـه
دون المعقـل يـوم للملـح دنــدان
ومن قبلهـم صايـل مزبـن د خيلـه
ومبارك ابن هريـس ملفـا ومزبـان
للـي لـفـوه طالبـيـن العديـلـه
قدم خيار الزمـل وبيـوت الاسكـان
وغنابـه الحافـي ويشكـر جميـلـه
وطاحوس مع مسلط وعقاب بن شبنان
نهـار كـون الضـال يـوم المهيلـه
حول بجمعـه وأمتـلأ الجـو نيـران
وثار الدخن بيـن العميـل وعميلـه
بقول الحضور وحضرة بـن ربيعـان
تحـدث بقصـيـدةً لــه طويـلـه
سهاج ما غيره من شهـود الاعيـان
أثنا على طاحـوس وأطـرأ القبيلـه
ربعه مدفنت الركـب يـوم الأ كـوان
نطاحـة البـارود مـا تنحنـي لــه
عشو طيور الجو والذيـب سرحـان
بصـاف الحديـد وحاميـات الفتيلـه
كم شيخ قومٍ هازهم وأعلـن إعـلان
وعند المواجه نـار وأعلـن رحيلـه
وجمع هل السمراء ونزل بن ريمـان
عبيـد حامـي نزلـهـم و الدليـلـه
والاد عبـاد المتاكـيـن ضـفـران
مثل الخيال إلى ارجـف ودق سيلـه
والاد نفـرا يــوم للهوش مـيـدان
منيعهـم فكـوه واخـلـو سبيـلـه
والاد حاسـن معطبـة كـل فسقـان
رجالهـم ينطـح جمـوع و قبيـلـه
وربع الطويل سعود ما هـم برديـان
مثـل الرمـاح الغاريـات الطويـلـة
بمسلبـات دون حـلـوات الألـبـان
من ضربها العـدوان ترجـع ذليلـه
وأمثال بن سحاب مع شيـخ بـرزان
بحليـت نذكـر لـه فعـولٍ جليـلـه
وقف لهم بالريـع بشهـود الاعيـان
وصمد صبي الحرب وأشفـى غليلـه
ولو باتوسع وأذكـر فـلان وافـلان
عندي سوالف كوم مـا هـي قليلـه
هاذي خواطر يـا العصيمـي بتبيـان
مـن هاجـسٍ مـا يلتفـت للهزيلـه
والناس والنقـاد يـا نجـر قشـران
حتى القبـر تنبـش ثـراه و نثيلـه
ولا حدٍ بسالم من قليليـن الإحسـان
شذايـة العرقـوب والحنثـو يـلـه
وأختامها أصلي على خير مـن كـان
علـى الـذي قبـره بطيبـه نجيلـه