ياخشف لـو مـا فالكـلام تجـارة
بقول لك قولـي وعقبـه ماشـي
الزيـن بيّـن لـو عليـه ستـارة
ياغصن ابانٍ مرتـوي ونشاشـي
عكش الهدب لو شن يمـي غـارة
صاب الضماير والحنايا عطاشـي
والجيـب فاتـح لـو تـزر زراره
صفحـة بياضـه بالقلـم تنّاشـي
وراك طعت اللي عـذل واشـواره
ان كان قلبك صدق كنـه شاشـي
منبـوذ راعـي النيّـه الـبـواره
الغل في كبـده يعـرش عراشـي
مانيب من يختـال عـورة جـاره
كنّـه مديّـن والبـلا غشـاشـي
تـرى نفاقـه زايــدٍ معـيـاره
يلعب على الحبلين وهـو الواشـي
وياربعنا اللـي تقطنـون الحـارة
يحول من دون العجـاج إرشاشـي
حاولت اجامل بالغـزل واشعـاره
مار البلا من حاجـةٍ فـي جاشـي
والطرقي اللي ما انتهـى مشـواره
يرفض يرافق مرتشي مـع راشـي
وان شاف رايش ماعطاه اخبـاره
لو مات / مع بعض العرب ماعاشي
وزن الذهـب بجنيهـه وقنطـاره
واليوم وزنه رشـرش الرشراشـي
والحـر ماياكـر بغيـر اوكــاره
وان حام في جو اخمـر الهقاشـي
وياذيب ياللي في القنيب اسـراره
حيد الجبل عندك وخـل الطاشـي
خذ من سواد الليل ضـوح اقمـاره
واحذر من اهل الضيعه المغباشـي
لو معـك منظـارك مـع النظّـارة
لا تأمن عيونك يجيهـا إغباشـي
لايذبحـك شـاوي بثـار جفـاره
فالذيب ماعاض الجفـر والحاشـي
من لا ينيشن يوم يرمـي الشـارة
ذخيرتـه راحـت عليـه إبلاشـي
وسود الليالـي توصـف الغـدارة
ماتظهـر الشوكـة بـلا منقاشـي
ولا هنت ياوقتً مضـى واذكـاره
اللعب عرقيشـه مـع العرقاشـي
ومن جاد جوده ماهجـوا خطّـاره
ووقت اللقا من لاغضب ماهاشـي
ومافيـه شـك الـدر فالمـحّـاره
والا الصناعـي صانعـه يعتاشـي