اخذت انا ل/ صفـر الـدلال القنـادي
واخذت صبـغ الزعفـران الفناجيـل
ولحفت ليل الصمت لـون السـوادي
واحسب نجومٍ لامعة في دجى الليـل
واسرفت بالتفكير حسـب اجتهـادي
حتى وصلت لمرصد الجدي وسهيـل
علم الفلك في مركز الرصـد هـادي
وتسلسل ابيـات القصيـدة هماليـل
الحـرف روحانـي وطبعـه حيـادي
وحسب العهد مايسمع القال والقيـل
وشهقت به غيض الحـراره ينـادي
الصمت وقتـه راح مابـه محاصيـل
وزفرت حرف اهتز منـه الحصـادي
سنابلـه مشروبـهـا وادي النـيـل
صار الموالي في صفـوف المعـادي
وبحكم من دقق // حروفـي قناديـل
لو بين حرف وحرف طـال العنـادي
كل الحروف تصير له طيـر ابابيـل
ضرب المشوّك من نزيـف المـدادي
غبن القلوب اللـي عليهنـه الميـل
ومن كف صاحب// برق حدب الهنادي
اعمى البصيـره للعقـول المهابيـل
الحـر يشبـع مـن كبـار الثنـادي
ان حام // يخمر خرب ماعاد له حيل
ماله مطير الخـرب وقـت الهـدادي
رعب الجـوارح مثّـرٍ فيـه بالحيـل
في الحرب مايعلـن نهـار الحـدادي
كلٍ يقـول ان الزبـا ناتـج السيـل
احـدٍ يقـول ان المواقـف جـدادي
لو حللوا بعـض الرجـال الأقاويـل
وفي كل موقف له سيـوفٍ حـدادي
وكلمة تميّـل كفّـة وتعـدل الكيـل
واحدٍ يقول انـه مـن العـام بـادي
ومادام جت فرصة خطفهـا تساهيـل
والعود قال السمـع سمـع الجـرادي
وادل مـن طيـر القطـا للمداهـيـل
ماهمنـي فعـل الذليـل الـربـادي
اموجهينـه عبـر شاشـه ودربيـل
قـوم الدسايـس جعلهـم للنفـادي
في الوجه ما يقفون قـدم الرياجيـل
والخبث والحيله لهـم طبـع عـادي
لا واخسـاره عزّهـم عقـب تذليـل
يحثى بوجه اللـي خبيـث الرمـادي
مهمـا تـرزّه لـه مذلـه وتقلـيـل
احدٍ سلاحـه طيـب فعـل الأيـادي
وان دافع إعن النفس قيل انته تعيـل
ياكبرها الشرهه مـن اهـل البـوادي
واللي سلاحه مكـر يجـزى بتبجيـل
لجل الطلب بأصبر سـوات المهـادي
واللي يجي بالطيب نجـزاه بالحيـل
له ذِروة المجلس وعشـب الحمـادي
ووجهٍ بشوش وكيف بـن ومعاميـل
والا الـردي مالـه علـي انتقـادي
وبعض الغلط ماله مع الناس تعديـل
وليا جزيته بالـردى الحـق سـادي
في محكـم التنزيـل عبـره وتمثيـل
وما اعلم بما تخفي قلـوب العبـادي
والحق واضـح لـو يبعّـد بترحيـل
ولا بـد دورات الليـالـي تـعـادي
وراعي الردى يندم ولو هو بعد جيـل