موضة الملبوس وش جابها لشبه المهاة
هي سلومٍ ماضيه او من الغرب اقتدت؟
ترتدي بدله رياضه تغطيها العباة
ماشيه في روضة خريم للشال ارتدت
بنطلون ولونه ازرق سماوي في سماه
والبلوزه للبنفسج والابيض وحدت
وقت عصر افترت وظهرها ليلٍ كساه
اثرها فلت شعرهاوشيلتها غدت
والبلابل غردت كل طير اسمع غناه
جاوبت صوت البلابل سلام وغردت
لو تمد ايدينها الطيرمد الها يداه
للمصافح يوم ليدينها ماصفدت
جيت ابا اكمل مسيري واعكس الاتجاه
لكن اني ماقدرت التفت لو عودت
صرت واقف في مكاني وتقرب لي خِطاه
والقوافي جات عجله بصوتي رددت
واقبلت متبسمه وجهها زايد بهاه
وارسلت يمي سهامٍ لقلبي سددت
عينها عين اشقرٍ شايفٍ جول القطاة
واثقه خطواتها لكل رسمة حددت
الخدود ورود والعنق من فوق احدداه
نابيات الابرقين ان مشت والا عدت
خصرهاشبرين وشوي ماصيب احتواه
والردوف تتلها تل لو كان اركدت
قالت اقرب كيف رجال يخشى من فتاة ؟
قلت يابنت الرجال المباني شيّدت
لا تنادي ضاميٍ ماقطعتي له ضماه
والقلوب الخضر تبقى خضر ماجمدت
ردني حكم الشريعه وتحقيق القضاة
صادرة لو جلسة المحكمة ماقد بدت
قالت التوصيف حذراك ياصل منتهاه
البيوت اللي لنار المشاعر اوقدت
خلهن في صدرك اللي لي السر احتواه
ضاحكه ضحك الخجل ولشعرها كددت
قلت ابا احذف لجل عينيك هذا مع هذاه
قالت الاغصان فزّت وشفها وردّت
واثر كل اللي حصل حلم غفوّه وانتباه
والحقايق كل حلمٍ حلمته بددت