يا ونتي.. ونة.. مضيع بعيره = بالفقيظ، والأرطا غدا له.. حزاوير
ياطا على الرجلين.. مثل السعيرة = والما.. ثمان أيام.. سج المعاشير
ونيت ونة ميس من ضميره = حنين خلج.. مفختات لهن ضير
يالله يا عايد.. على كل ديرة = من غر مزن.. يوم تات يحوادير
يا عالم.. ما بالخفا والسريرة = يارب.. يا رزاق.. عوج المناقير
ياالله عسى ما تكره النفس خيرة = يا والي الدنيا.. عليك التدابير
وراك يا مانع . تبتن.. بحيرة = زود على تلطيخكم.. بالمعايير
صلبية.. يا شيخ.. ماني نحيرة = وانتم نحايركم.. رقاب المناعير
تذم من حطت بقفوك.. حجيره = حنا صليب.. ولا علينا تحاجير
مانع.. ليا ركب الجواد الظهيرة = ما له حلي.. يعلم الله حذا الزير
زير العراق.. اللي ربي.. بالجزيرة = وافي الخصايل.. كامل بالتشابير
زين الحصان اللي قطاته كبيرة = إلى شلنه.. مبعدات المعاذير
خبال شقح . ما يردد نشيره = لي جن على روس الزباير.. دعاثير
وان روحت . من خايع.. مستديره = تودع على البيت المطرف.. معاصير
يطعن لعينا فاطر له.. ظهيرة = غبوقة الخطار.. برص المواخير
تشرب حثاوير القلص . مع غثيره = وتشرب صرات العد.. قبل المقاهير
لي شافت الغارف.. تزايد زويره = بجنوبها.. تنحي الظومي عن البير
وجدي على اللي ما تبين بغيره = مدهال.. سمحين الوجيه المناعير
ما انساه.. كود الحضر.. ينسون ديرة = والبدو.. ينسون السلف والمظاهير
ما انساه.. لين اسمير ينسى الجزيرة = وبنية الجريا.. يخلي الخطاطير
وما انساه.. كود فهيد.. ينسى بعيره = والخيل خلن.. الحذا والمسامير
من طلعة البيضا، وانا النزل اديرة = ما شفت زول اعشيري بالدواوير
يا داير الغربي.. عشيري تديره = تنجي صخيف الروح من ل حيير
يا عيد.. لون اصويحبي ضوح نيرة = والا بروق الصيف.. تلعج ورا النير
حنا قسمنا الله.. عبرنا الجزيرة = يردنا منشي السحايب على خير
واللي فرق.. بين العشير.. وعشيره = هو.. له.. وانا ليه.. عليم المقادير
نويت ابدل دارهم.. يا منيرة = اتبع مزون.. مقفيات.. محاذير