عليك ياهاجسي بسم الله اسمي = من نظرة قسمتني خمسة اقسامي
ياهاجس الشعر ياكسري وياضمي = عضيد يمناي في الشدات وحزامي
خاوي يمين تحب منثر الدمي = وتغار سبابتي من بصمة ابهامي
أبوي راسي وجدي ضلع منزمي = من لابة وقعها يروى به الظامي
ماهو ردي الحظ كان العلم ماتمي = راعي يمين ماعرف لبضاعة الشامي
ولاني محدود للضيقات والغمي = يسهل الله طريق شعيل وغلامي
عذرك قبلته ولا روحت منحمي = يازين..ياطارق الحامي وهو حامي
كاسيني الصبر من كمي إلى كمي =ما الله كتب واسلم المرمى من الرامي
عزيز محشوم قدرك وارد جمي = بيت على الطيب ضم رجال وايتامي
وصاني ابوي وانا اشرب حليب أمي = على رفيقي وابن عمي وغرامي
ما انت مصدق تمهل والتفت يمي = أنا عزوبي ولكن تقبل اقسامي
والله علي الحرام انك مثل عمي = أعمامي اثنين وانك ثالث اعمامي