القصيد ان ما أنحى لك يستـوي عرضه وطوله = والقوافي والجروح ودمعـــة اللقيا حلالك

ليه أغني للقمر وانتــي على الارض محموله = وليه اسولف للسما وانجومها عقـدك وشالك

الشهاده حق قبل أمـــــوت من زينه وهوله = اشهــــد اني ميت بك في غرامك واحيى لك

دلعوه وقـــــــــدروه وبالحنايا فسحوله = واشهــدوا له بالحلا يالحنبليه قبل مالك

غادي لك في ضميري بالهــــوى صوله وجوله = كيف ما استاهل غـلاك ولومتك واعشق قبالك

انت عيدي انت سيـــــدي وانت شيء حسبوله = العيــــون وخاطري وايدي تضحك في وصالك

انت عام الحب كله واروعه واجـــمل فصوله = انت ابو شعري وانا والشعر كنا من عيالك

هز جذع القلب يسقط لك رطـــب شعري ولوله = واشرب زلال المعاني بالهوى ياطــيب فالك

يوم صارت ساعـــة الفرقا على مثلي عجوله = اغتنمت من الدقـــــايق لحظتين كلها لك

قول كل اللي تقول وطـــول كل اللي تطوله = بس انا طالبك طلبه خلني دايــــم ببالك

وكل هرج مايسر القلب تـــــــكفى لاتقوله = انت في عيني وحــيد وانت في قلبي لحالك

وانت رجم في فياض القلب وانت اوسع سهوله = ليه ماخلي النظر والـشوف يرتع في جمالك

المدى والوصل فيني والخـــفوق ابن حموله = ليت ماضــــــمت جنوبي لفحتين من شمالك

ان ذكرت النجم والا سهـــيل والليل سدوله = اذكري ظامي طلب له رشــــفة من كف هالك

ليت مالي من ثلاثيني ســــوى عمر الطفوله = وليت ياشمس المحبه ما انظرت عيني زوالك

لاتعلم بالغلا والحــــــــب مايمرح عذوله = اذكر اني قـــد عطيتك كلمتين وقلتها لك

القصيد ان مانحنى لك يــستوي عرضه وطوله = والقوافي والجروح ودمـــعة اللقيا حلالك