كنت افكر ويش يعني فيك زايد..=عن جميع الناس يوم اني أبيك ؟

قلت اخوي؟/ وصاح بي "صَرفي" يكايد:=لا "أخوك" ولا"أخاك" ولا "أخيك" !!

من وانا طفله وانا قلبي محايد=مادريت اني بابيعه واشتريك !!

كل سهل ٍ دون حبك صار كايد=وكل كايد تزهله لمسة يديك

ما لبست الا مسابيـحك قـلايد=ما كحلت الا عيون ٍ تحتويك

ما سكت ّ إلا إذاْ فصمتـي فوايد=ماحكيت الا إذا سولفـت فيك

وان ذكرتك ليل / جافيت الوسايد=وان ذكرتك صبح / شبيـّت التريك

واخفي اسمك لا قريته فالجرايد=من كِثِـر مااغير يا قلبي عليك

والهلال إن هلّ .. محد ٍ به يعايد=يحسبونه حاجب ٍ من حاجبيك

قلت لي بآجيك وثـيـابي جدايد=راحت اعيادي وحـنـّا نحتريك

جيت احبك وابدع بيوت القصايد=قلت يمكن / هالذي جاني يجيك

ليه افكر ويش هاللي فيك زايد ؟=يكفـْي اللي زايدك .... كوني أبيك