السكارى بعد نص الليل يرقون الرصيـف=لابدا التركيز يضعف في مسارات الخطـا

وانت عاقل لك عيونٍ مبصره مانت بكفيف=كيف في عز القوايل جيت عايـم بالخطـا

لاتحط اللوم من فعلك على ظهر العسيـف=وانت تركب لك جوادٍ طول عمره مامتطـا

عمر خيل الكذب يذبل كنه اوراق الخريف=باطل ماكان باطل لو علـى غيـره سطـا

الظروف الها صحيح احيان تيارٍ عصيـف=تجبر الرجال ينزل مـن بروجـه للوطـا

بس يبقى الحق حق وسيف مامثله وصيف=لاتدنـى بالسفايـف ثـم بهـا تتورطـا

العتب واللوم للي مقصد افعالـه نضيـف=واضح مبـداه راسـه مايدسـه بالغطـا

مانلوم اللي من اصله لو كبر عقله خفيف=لو يشوف النار قدمه وسط جمرتها وطـا

مشكله لاصرت صاحي بس تفكيرك ضعيف=ماتعرف ان التعامل فن فيه اخـذ وعطـا

الحياه دروس فيها موقف صعب وظريـف=والمواقف تفهم الجهال مع طـول البطـا