قد قلت لك قبـل الفـراق احفظينـي=لاتتركينـي بيـن هـذي وهـذيـك

اصيح باعلى الصـوت ماتسمعيـي=ماكن صوتي لـو سمعتيـه يعنيـك

قلت لك بالضبط اعقلـي وافهمينـي=لاتطيرين القلب مـن بيـن اياديـك

يامارجيتـك بالـهـوأ ترحميـنـي=من كثرة ظنونـي بلحظـه تجافيـك

صدقت هرجك يـوم قلتـي تبينـي=وجيتك على كيفك من البعد هاويـك

قلتـي احبـك حـب مالـه وزينـي=ومافيه غيرك في حياتـي يساويـك

وانا عشقتـك عشـق بيـح كنينـي=ماغير اصيح بعالي الصوت وادعيك

ماعاد يملى العيـن غـروٍ حسينـي=ولا عاد اشوف الانت من كثر ماغليك

عديـت حبـك لـي شـي ثمينـي=ابيع غيرك وانت بعيونـي اشريـك

واحتاست اوضاعك يسـار ويمينـي=وحطمتي صروح الغلا مـن تعاليـك

قلـت اتحمـل دامهـا تهتويـنـي=ورميت نفسي بالخطـر والمهاليـك

مخلص واقول الوضع باكـر يزينـي=وترجع كمـا كانـت بايامنـا ذيـك

ادمح وابـرر موقفـك كـل حينـي=ماكنت اعرف اللي خفى من طواريك

اثرك بعـد شفتـي غرامـي دفينـي=تغيـرت نيتـك والله دعـا فـيـك

قلتـي مادامـه خاتـمٍ فـي يمينـي=بشوف غيـره واتركـه بالشرابيـك

طبعـك كـذا تلهيـن بالعاشقينـي=ماخفتـي ان الله بفعلـك يجـازيـك

مافاد بـك نصحـي وزايـد حنينـي=غرك قصيـدي تحسبينـي ماخليـك

واليوم روحـي وابعـدي لاتجينـي=اقولهـا مـن قلـب مابيـك مابيـك

مـادام ماصنتـي غـلاي اتركينـي=ماني بميت يوم اشوفـك ولا اجيـك

ابطلـب الله فـي فراقـك يعيـنـي=وانساك وانسى كل لحظات ماضيـك

بمسـح بقايـا دمعتـي واعذرينـي=لاعـذت بالله كـل ماحـل طاريـك

درب الهوا والعشق مالـه ضمينـي=في غير درب الشرع ماله مساليـك