اهـلا هـلا ياقبلـة الـدار حيـاك=وسط الخفوق اللـي لعبَـه هواكـا

القلـب بيتـك والمعاليـق مربـاك=مالـك ورا حـد المحانـي شراكـا

استمتع بوقتك عسـى الله يرعـاك=فل الحجـاج وغـن محـدٍ معاكـا

والله مابه شـي بالعيـن يسـواك=ولاحدٍ ملك عقلي وقلبـي سواكـا

كل العذارا بعتهـن لجـل عينـاك=لايلحقـك شكـه تراهـن فـداكـا

انت الذي في داخل الجوف ملفـاك=تامـر وتاخـذ بالهـوى مبتغاكـا

ماكنت اعرف الحب والشوق لولاك=انت الـذي علمتنـي مـن غلاكـا

تفداك روحٍ عدهـا مـن ضحايـاك=ان كـان مالله للمواصـل هـداكـا

ياعين ابوي انته عسى الروح تفداك=ارفق علي شـوي ماقـوى جفاكـا

كل الجوارح تشتهي فيـك تبغـاك=على غرامـك بالخفـوق اشتباكـا

ينتابنـي لامـر بالسمـع طريـاك=نوبة جنـونٍ تنتهـي فـي لقاكـا

مجنون في بعدك وعاقـل بلقيـاك=ماقدر اعيش العمر لحظـه بلاكـا

انت الذي تزعل واجيك اطلب رضاك=ازعل جميع الناس واكسب رضاكـا

ياروح روحي لو تراكـم خطايـاك=تضيع لامن شفـت باهـي حلاكـا

محلاك ياسيـد الغناديـر محـلاك=الزيـن جمـع فتنتـه واحتـواكـا

كل الوصوف النادره مـن مزايـاك=ربي من انواع المحاسـن عطاكـا

مالك شبيه يشبهـك فـي حلايـاك=متميـزٍ حتـى بـجـرة خطـاكـا

المسك ريحك والعسل داخل شفـاك=بين البرد والجمـر معسـول فاكـا

مثل البـدر لابـان طلـت محيـاك=لاحولـت سـود الجدايـل وراكـا

الورد في خـدك وشامتـك تزهـاك=علامـةٍ يدلـهـا مــن غـواكـا

اذا هرجت الهرج ذايب علـى فـاك=كنك تكلـم مـن طـوارف شفاكـا

احيان صوتك يسمعه مـن توحـاك=واحيان من سمعك يجيـه ارتباكـا

غنج ودلع باسلوب راقـي وفتـاك=خلـى حبيبـك خاتـمٍ فـي يداكـا

ماودي ان الناس بالوصف تقـراك=دام الغـرام اللـي دهانـي دهاكـا

تسلم يمين اللي على الطهر ربـاك=انا اشهـد انـه بالنعومـه غذاكـا

اغليك واحبـك واعـزك واهـواك=واموت في ريحتك واعشق ثراكـا

جزل القوافي في قصيـدي تبنـاك=هاك المشاعر ياهـوا البـال هاكـا

هذا الكلام اللي يسرك اليـا جـاك=من شاعر بالجـزل قافـه يحاكـا