ياقاري اقر البيوت اللي على اطهـا=اللي يجي عجزها قافه علـى آنـه

لاتخطي الحرف ثم تقعـد تمغطهـا=وتصير عاله على الشاعر وقيفانـه

الحربي اللي بيوتـه يـوم قلطهـا=من كل معنى لفت بالحيل رويانـه

للمفرده فارسٍ بالشعـر ضابطهـا=مابان منها تشوف الجزل باركانـه

ابيـات شعـره بقيفانـه يفقطهـا=للعلم والمعرفه يتعب على حصانـه

ابنتحي يمهـا ملـزوم واشفطهـا=وابطلق القاف معها وارخي عنانـه

يكرم عن اللي يجي بالغث حاقطهـا=كنه ينادي علـى عيبـاه بلسانـه

اكثر بيوته مـن الشـارع يلقطهـا=ويصفها جنب مايطلع من اشجانـه

الصفحه اللي مضت ماني بعافطهـا=ممليةٍ من فعول الطيـب منصانـه

ايامنا اللي مضـت كنـا نعارطهـا=واليا صفت كشر الغـدار بسنانـه

اجواد نوفي لها وانـذال نزنطهـا=مانشري اللي تجي بالسوق هريانه

الشعره اللي براس الكبـر نزلطهـا=ويصير ابوراس كنه ساير اخوانـه

الحيه اللـي يبيّـن لـك تراقطهـا=اشوى من اللي تلـون دوم خوانـه

اذكـر ديـارٍ كثيـراتٍ مساخطهـا=عجاجها ثايـرٍ والنـاس ضميانـه

لوغيـر بترابهـا يكثـر ترابطهـا=تلقى بها ناس صح وناس تعبانـه

احباب واصحاب واربوعٍ نرابطهـا=واغراب وانذال بالاضـداد مليانـه

ياما سقينا المزارع من مشفاطهـا=وياما صفى الجو مهما ثار بركانـه

ماحسني غير عودٍ قـام يزرطهـا=اشيمطٍ في حياتـه ضـاع برهانـه

والديره اللي شلعنا مـن مهابطهـا=في صحصحٍ مانبيه لكثـر وديانـه

يوم امحلت زاد غاويها وساقطهـا=والحذف ناش المسالم وسط مسكانه

واللي سترته عن الناس وتخبطهـا=مانته بناسيه قصدك بس حقرانـه

اللي بيوته مـع الـوادي ملابطهـا=لاجا نهار المواجـه يرخـي اذانـه

والحمد لله طلعنـا مـن مباسطهـا=ماعاد تلقى لنا فـي خانهـا خانـه

في كل ديره نجي نرسم خرايطهـا=نعرف حقوق البلد ونكـرم اعيانـه

رحله وفا خيرها في تالي اوسطهـا=والخاتمه لابـدت ويـاك ربحانـه