ياشينها لاصـرت واقـف لحالـك=علـى طريـق مايمـره ولا زول

تقول هالك وانـت مانتـه بهالـك=مالك جـدا ياكـود ترديـد يحـول

هذا ترا حالـي ولا هـوب حالـك=لنك من الاحبـاب منتـه بمعـزول

كلٍ يبي عرفـك ويبغـى وصالـك=من جاك روح ياهوى البال مشغول

وانـا بفكـري مايفـارق خيالـك=كنك بعقلي دايـم تصـول وتجـول

ماقـول الا جـمـل الله حـالـك=خل الذي فالقلـب مـاودي اقـول

ماودي اوصف ماخفى من جمالـك=اخاف وصفك لابدا يسلـب عقـول

لكن ابوصف حال من جـا قبالـك=اذا نظرك بنظرته عرض في طول

لامن قلط واحرفـت يمـه دلالـك=حتى ولـو ماذاقهـا راح مذهـول

تبتعـد عنّـه برجـلـه مشـالـك=حتى ولو دربك على طول مجهول

وان كان حظه حرره مـن حبالـك=يروح من عندك بلا عقل مسطـول

تدري عشان ارضيك واسر بالـك=اسمحلي اوصف شي بالعقل معقول

ريان عودك مـع حـلاك ودلالـك=غير العيون السود والريق معسـول

والخد برقٍ شع فـي ليـل حالـك=يضوي على نجلٍ بها السيف مسلول

الزيـن فـي يمنـاك والا شمالـك=الا انت كلك صرت لزين مدلـول

ماهمنـي لـوزاد فينـي هبـالـك=احسن لي ابعد قبل لاصير مهبـول

اجرح وسو اللـي بفكـرك بدالـك=بس انتبـه بالله لاتطـري حلـول

لاني ولد عمـك ولا ولـد خالـك=صدفه تلاقينا على غير محصـول

ماني بعبـدٍ لـك ولا مـن عيالـك=شاعر علم وانته من البيض مجمول

روّح ترى دربك من اليوم سالـك=من الآن ماني عن مودتك مسئـول

ماقول لامـن رحـت ادور بدالـك=اقول ياجعلك تهنـى علـى طـول

تراي من عقبك قطعـت المسالـك=واخذت لي تطعيم عن كل مكحـول