قصيده موجهه للشاعر الكبير لافي بن حمود
الغيداني الحربي بعد ان سمعت احد دوواينه
الصوتيه آمل ان تنال الرضى


ياذيب هاجوسي على خافقي عو=فج الضلوع العوج وازعج عواكا

سبع العجايب كلها شفتهـا تـو=في نظم قافٍ بالمعانـي يحاكـا

قيفان لافي بالحشا ولعـت ضـو=منها صويب الشعر مابه حراكـا

يالافي بن حمود ماتشتهي سـو=مادام نبع الشعر يجـري وراكـا

لاشفت قافٍ شاردٍ قلت لـه خـو=ماشاب قاف الا تشبـب وجاكـا

بنات فكرك باعذب القيل تسمـو=تعكس لمن يقراء عجايب دهاكـا

ترقى على الجزله وتنزل على جو=محدٍ يجيب اللي تجيبـه سواكـا

ياطيب المعدن من اغلى الدرر حو=خل الذي يتبعـك يحـذو حذاكـا

كل النفوس الضاميه ريقهـا رو=مادام ربي مـن جزيلـه عطاكـا

شعرك رفع شعر النبط فوق للجو=سحايب الجزلات غطـت سماكـا

قيفان شعرك كنهـا وابـل النـو=من سيلها عشب القصايد شراكـا

على ظفاف المعرفـه جالهـا دو=روض تساقا من ينابيـع ماكـا

شعرك يخلي ساحة الشعر تحلـو=حتى ولو من غث غيرك تشاكـا

لابد مايـوم مـن الغـث تخلـو=مادام به مثلـك وغيـرك معاكـا

يبقى مقامك زايـدٍ قـدر وعلـو=من ساس قومٍ ماتهـاب العراكـا

قوم على وضح النقا تورد السـو=خسران منهو للحـروب يتراكـا

قدامهم يطيـح مـن قـام لاجـو=في ماقفٍ للصف فيـه اشتباكـا

يقوله اللي حس به ماقـرا لـو=مايعرفك لكـن بشعـرك قراكـا