لا تنظرون الزيـن لامـن تسـوَح=خلوه يشفي علـة القلـب ويـروح

يرتع قدم عينـي واذا صحـت روّح=وان راح تلقاني من الوجد مطروح

مادام حبه من ورى الحـدب طـوَح=اكيد باني له بقلب العنـا صـروح

ماني بقايـل فيـه مثـل الملـوح=حتى لو اكتب حرف قافي على لوح

لن الحروف لعطر وصفـه تـروَح=واخاف اذيع بخافي السـر وابـوح

من كثر ماغلي صاحبي قمت ابـوّح=ببيات شعر قافهـا ينعـش الـروح

الشاهـد الله بالمفـاتـن تـشـوّح=تقدر تقول بزايد الحسـن مفضـوح

فيه الوصوف بكف حسنـه تلـوّح=للطهر والعفه على هامتـه ضـوح

قلبي بحبـه ياهـل العـرف فـوّح=فوح الدلال الصفر لا جالهـا فـوح

مالي جدا ياكود اهوجـس وانـوّح=واجاوب القمري على عالي الـدوح

صحيح مـن زايـد غـلاه آتـآوِّح=لكن اقول انه بـلا شـك مسمـوح

تميت قافٍ جزل صـدره علـى أوّح=من شان عينه صار عجزه على اوح