ان بغيت احكي وش اللي فيه اقول=تعجز حروفي وتخذلني المعاني

بعد حكيه صابني صمت وذهـول=صوته اذهل مسمعي صوته خذاني

تاهت حروفي وانا طبعي خجـــول=والحكي يعجز على نطقه لسانـي

ثابتٍ حبـه بقلبـي ... مايـزول=مانسيته لو هوى قلبه نسانـي

جبتله كل الوسايل والحلـول=ودي احلم به ولو حتى ثوانـي

حظي اعوج والصبر يمكن يطـول=ويش اسوي يوم يخذلني زمانـي

خانت ايامي وانا ودي الوصـول=للحبيب اللي بحبه احتوانـي

دارت الدنيـا ولامنها ننـول=غير همٍ مندثر وسط المحانـي

ذاهبين وعمرنا لو هو يطـول=ناصل لوقتٍ بها كل شي فاني

ربي اعطانا احاسيس وعقـول=ونعرف المظلوم من ظالم وجاني

زاهدين ومانبي حب الرجول=ومانذل النفس لفلان الفلاني

ساسي ان العشق له حد وأصول=وان تزل الرجل لي قلب يعصاني

شيمة اهل الطيب زاهين الفعول=صاينين الحب طاهر لايهاني

صعب ابنطق والحكي اللي بي يجول=يلمحه بعيونـــه وقلبـــه قراني

ضيه ونوره حضن قلبي الملول=لين احيا قلبي ونوره كساني

طمّن القلب الذي صابه خمـول=وضمّه بلهفه وغطاه بحنانـي

ظني ان الحب يغلبه العذول=مادريت انه على قلبي كواني

عادت الافكار بالقلب العجـــول=وذكرتني في ليالي الحب ثاني

غربةٍ قضيتها صولٍ وجـول=اضحك بوجه الزمان اللي بكاني

في حياةٍ لابها رفــض وقبـول=غصبٍ ارضاها ولو حزني كفاني

قسمة الله مالنا عنها عـزول=ربي اللي ماخذ وربي عطاني

كم رمتني في ثقيلات الحمول=وصفقت بي لين هدت بي كياني

لملم اوراقه وحالي في ذبول=راح عني مايهمه لو أعانـي

ماصحيت الا على دق الطبول=فرحتي اكبر من احساسٍ لفاني

نقبله محبوب لايرسل رســـول=له بوسط القلب منزال ومكاني

هذي كلماته بها قول معسـول=ذوّب احساسي معه حتى شجاني

وانعش احساسي بعد ماهو مخذول=هو ملأ دنياي وحسسني بأمانـي

يعني بكل الوسايل والحلول=والله اني مـاأرده لو نصانـي