وش قلت علمني..ابسمعك وش قلت=عيـد الذي قلتـه ترى عندي اعصـاب
ايه اعْـرفك شامخ ولا يوم قد مِلت=و انّ الهوى طاعك وصرت انت غلاب
لكن تهددني وانا ما بعد شِلت=من كفك كفوف الوله شوق وعتاب
صح اني آحبك ومن خافقي نِلت=ما لا خطر مره على بعض الاحباب
لكن بعد حبك ترى قدرك سْفِلت=ادعس على وجهك وامسّـح بك تراب
اسمع..ولاكلمه..ومن قال كمّـلت..؟=ثمّن كلامك لي وحسّب له حساب
حطْ عينك بعيني..انا ما تبدّلت=أنت الذي كلك على بعض كذاب
أنت الذي شدّيت لك وصل واهملت=و امسيت ادورك لك على هجرك اسباب
وانت الذي تجرح وانا كم تحمّـلت=واصبر واجيك وخافي الجرح ما طاب
لا تعتذر مالك عذر بعد ما قلت=دام انها جـت منك ياللـه مع الباب