القيض ماهوب أسعـد أيـام ربـي=اللي يحط به النـداوي ورا البـاب

لو يمدحـه مـن للعـذارى محبـي=راعي الولع هذاك للقيـض سبـاب

الى قامـت الجـوزا علينـا تهبـي=ونحت علينا مرزم القيض وكـلاب

وقامت لهايـب كـل نجـم تشبـي=وصار الهوا من واهج القيض ملهاب

ودارت على الماء الصادرة والمغبي=وردت عريجا كلها جـرد الأرقـاب

دام اليمـانـي فـاهـق ومتخـبـي=ليل ونهار الها على الحوض ظبظاب

لو يقرع القـراع غصـب تضبـي=الجـل تدحـم والمخاليـل هـراب

لين الصبـا طلعـة سهيـل تهبـي=ترفع على اربع والهوا صار خنياب

وقام العنس في العود الأخضر يدبي=خمسين يوم وزود يوميـن بحسـاب

قام الفحل في البـل هديـرة يقبـي=واولم على وكـره يبالعيـد حطـاب

شفت السحاب اللي بروقـه تشبـي=من صيب الوسمي تبارك الى صاب

واصبحـت تسمـع للعـوم متنبـي=والحر الاشقر جاك بيديـن جـلاب

تشـوف نايـف للصقـاره ملـبـي=وقبل امس قد روح الى الغرب نباب