قصيدة حميد الذيابي

الله من قلـبٍ بـه الهـم حارقـه=دايم وهمـه لازمـه مـا يفارقـه

الهم في قلبـي بنومـي ويقظتـي=سوى بقلبي مثـل وسـم المارقـه

ومن كثر ما هوجس تعودت للسهر=لو كل عيني في حلا النوم غارقه

وأنا عيوني مايجي النـوم جفنهـا=حتى عليّه تصبح الشمس شارقـه

نديمى اليـراع والتبـغ والـورق=ماهوب خشفٍ مقدم الراس فارقه

وغطست في بحر المعاني وقستها=في غبةٍ تصبح بها السفن غارقـه

في غبةٍ ما غاص فيها أكثر المـلا=الا العطاوي غايصتهـا زوارقـه

حيث إن بيبـان المعانـي مغلّقـه=ولا كل بابٍ يفتحه طرق طارقـه

وخلاف ذا يامن يـودي رسالتـي=يم الأديب اللـي نزيهـه معارقـه

رفيقي اللي مـا تشكـك برفقتـه=لعل دايـم بيرقـي مـع بيارقـه

طيب ومن ربعٍ ندى الطيب سوقها=الطيب ساسً فيه ماهوب سارقـه

وطافت لبو نواف شهرين مارجـع=وأثره قنص والوسم مالاح بارقـه


***

رد العطاوي على حميد

حميد قلبـه جايـر الولـف خارقـه=وقلبه خضر مير النياحـت وارقـه

من عقب مايبكي علـى قايـد المهـا=اللـي يلاقـف كـل يـومٍ مدارقـه

اليوم نسـاه الوفـاء لوعـة الهـوى=أللي منـول غـارقٍ فـي دوارقـه

لبيك ياشكـاي مـن بعـد صاحبـه=زرني وخل النـوم عينـك تسارقـه

وراع الولع ياحميد ممسـاه فالخـلا=ألـذ مـن نـومٍ السريـر ونمارقـه

وأنته قعـدت بـدار حوريـة البهـا=وقلبك عليها رمح الاشـواق مارقـه

خابرك ماترخص غلا ظامر الحشى=أللـي مجاديلـه تـلاون عشارقـه

وأنا غرامي فالخلا هـدت الوحـش=في خب عـرقٍ مبـذرات مطارقـه

إلى شفت به دوس الحباري مع الندى=تسابـق الأسليـح تقطـف شبارقـه

وشرفت بالطلاع فـي عالـي النبـأ=متشمحـطٍ للطلـع والعنـق زارقـه

الى شافهن شفـت الدلايـل بناظـره=وطلعـه عليهـن بيناتـن فـوارقـه

والشعر لو صعّبت قافه يطيـع لـي=ياللي عيونه عن حـلا نومـه آرقـه