قصيدة العطاوي

يقول منهو جايـر الشـوق لازمـه=مسيمً مهيـمً عبرتـه فـي لهازمـه

قلبي من العـذّال مايسمـع النـدى=وهواه يم اهـل الملازيـم عازمـه

للغـرب عيّـا لا يسانـع لجـاذبـه=وللجدي في ضلعان اجا الشوق لازمه

وللشـرق شطّانـه يتلـه ويجذبـه=يم الرشيدي عن هوى الغير خازمـه

نصف سرى يم ابو نايـف وجـوده=والنصف الاخر عند ابوسيف حازمه

يـا مشتتيـن القلـب بالله تجمعـوا=لعـل قلبـي يقضبـنـه مـلازمـه

ياناس وشلون البحر يسكن البحـر=وضلع الينوفي يم اجا ويش لازمـه

اخاف من موج البحر واذكر الغـرق=وقبطان سفني دايم المـوج هازمـه

والضلع مالي نطحةً فـي مصادمـه=صم الصفا مالي جدا فـي مكازمـه

واقلبـي اللـي راح منـي ولا بقـا=الا رسيـسً فيـه هـمً مـوازمـه


***


رد عبدالله بن نايف بن عون على العطاوي

دمعي كما سيـلً تجـارى مرازمـه=قامت تسابق فوق خـدي عوازمـه

والقلب من زود الولع لج وانشغـل=كن الغليث بروس الانيـاب بازمـه

يحن حنّت خلـف ذودً شكـا الظمـا=يوع النيام اللي سهـارى ترازمـه

اسباب خطب يشتكي فيـه صاحبـي=قلبً تقسـم بيـن نـاسًً تجازمـه

تناصفـوا قلبـه اثنيـن يحبّـهـم=والكل منهـم راح يقضـي لوازمـه

واحد حـدر يـم الكويـت لقبيلتـه=والاخر مشاكيـل الطنايـا تعازمـه

وامسي بجو ف به من القلب مابقى=الا قليـل خايـفً مـن مهـازمـه

ولو ان مفقوده عن الوعي منتكـس=ماكان جاه احدً يبـي مـن كرازمـه

لكن قلـب الذيـب يطمـع وينطمـع=وهذا الكلام اللي على الصدق جازمه

وضلع الينوفي والبحر في رجا المطر=لو المطر تخشى صواعق روازمـه

ينبت بها المحـار فالبحـر والكمـا=فالبـر يجنـا فـي ليالـي موازمـه

جعل المطر يضفي على البر والبحر=نوً مـن البـدري يـروّي ملازمـه