ماجـيتك أسـأل عـن طعـونك في حشاي المـوجعه=ولا جـيت أبسأل عـن نهاية صـدك وذاك الجفا

جـيت أشـكرك عـن كل دمـع مـحـرق ما تســمعه=وعـن كل عـذر لاسـمع حـرق المدامع قال أفا

يا صاحـبي والليل حـلـم شـايـل سـقـمه مـعه=لافـتحـت عـين الشـقا غـمـض عـليها ثم غفا

كم كنت أسـولف لك عـن الحـب وطـعـمه ومنبعه=وكم كـنت أمني بارد الأحـساس بإحساس الدفا

ياصاح لا تشـره بعـد ضـاع الجـمل واللـي معه=قـل ربما صـدمـه عـنيـفه هـزت الشعر وهفا

لو عـاد تـدري وش غـبن شـعري ثم أدما مدمعه=وخـلا سكون الـقاف يشعلها على جـبال الشفا

إن تعـذر اللي شاقـت الدنيا عـلـيها فالسعه=وإن تعـذر القلب المـتيم بالسعاده والصفا

والبـدو لا لاذا الـدخـيل بسـترهـم قالوا دعه=وشـلون لا لاذت هـنـوف بسـترهـم تـطلـب وفا

وشـلون أنا لالـذت بـــك مسـتـنجـده مستفزعه=أطلـبك بالله ثـم بأمـانه ثم بوضـع مؤسفا

إنك تـزيـد طـعـونك بجـوف الخـفـوق وتوجـعه=وإلا تجـي وأبـحـث أنا ويـاك أسـباب الجفا