في بدايات الخطايا آآآخر اوراق الصواب=صـاح دمـي ياوريدي,, قال وين المحبره

ضجـت افكـاري كفايـه ظلم ياعاشق سراب=أسرنا طالت سنينه بعثرتنا البعثـره

انـتشـت فينـي بدايـه في نهايتها عتـاب=من بعـض ناسـي ولكن أخسر اللي أخسره

السمـا فيها سحاب وعيني ماشافت سحاب=أحتري تمطر لقاها مير عيـّـت تمطره

سالت همومٍ جليلـه فوق صدر الانسـكاب=عقبها ماعدت ابالي لو خفوقي تعصـره

عقبها حرّفـت حرفي تكتبه ريشـة غـراب=شكله الفاهي يتيـم وداخله فيه اخطره

في حياتي صرت هايم بين سكرات العذاب=أحتقر ذنبٍ صغير وأحترم منه اكبره

شفــت انا سود البيارق لابسـه بيض الثياب=وخلفها بيض النوايا وجيهها الي مغبره

ءالتفـت الصوب الايمـن شفت لي كومة ذباب=معركتها مستديره فوق قطعة سكره

وانتبهـت الصوب الايسر شفت أعجب من عجاب=طفل في عمره صغير وعاشقٍ قلبه مره

وشفت زهرالأرض يعصف في نواويره هباب=غيّراوصاف الحياه وجاب وصف المقبره

والنجوم اللامعه من بينها طاح الشهاب=انتهى عمره ولكن آآآه ماقوى منظـره

أشعر ان الوقـت وقّـف واصبح ايعيد الحساب= وعـوّد ايقيس المسافه في قياس المسطره

هذي ابعاد الحقيقه كان للصدق انتخاب=والثمر منهو يودّه ياصله باعلى شجـره

وفي بدايات الخطايا آآآخر اوراق الصواب=صاح دمي ياوريدي,, قال مامن محبـره