بسـم رب الكـون خـلاق العبـاد
=محيي الأرواح فـي يـوم المعـاد
ابتديبـه واطلبـه درب الـرشـاد
=قبل ما أ بدأ فيك يا قطـف الثمـار
بعدها لحظة معـي يـا سامعيـن
=لو سمحتوا في كرمكم طـا معيـن
تجربـة وأقولهـا فـي كلمتيـن
=والكمـال لواحـدٍ شـق البحـار
والسلام اهديـه للرجـل اللبيـب
=والتحيه ريح هيـل وريـح طيـب
الردي ماله بهـا حـظ ونصيـب
=عابـره للحـر مزبـان الـحـرار
الـرجـال اشكالـهـم متـعـدده
=والسعيـد اللـي وليّـه ســدّده
قبـل ماتاخـذ وماتعطـي يــده
=يجعـل لنفسـه مكانـه واعتبـار
حي رجـالٍ تقـي راعـي صـلاه
=لــذّة الدنـيـا مخليـهـا وراه
مقتنع راضي بمـا ربـي عطـاه
=عارف انّ الله كتـب رزق وعمـار
غيـر رجـالِ حيـاتـه غـارقـه
=بالمعاصـي والذنـوب الحـارقـه
ولو شنوه الربـع ماهـي فارقـه
=كل همـه كيـف راسـه والدمـار
وفيه رجالٍ بشـوش ليـا حضـر
=يِفْرِح المجلس وهرجه لـه ثمـر
بالنصايـح والمثـايـل والعـبـر
=ينفعك لو جيت له في كـل شـار
وفيـه رجـالٍ ليـا جـا للعشـا
=فالبعيـد وفـي معزبهـم وشــا
وبعد ماكدّر صفا المجلـس مشـا
=خبل مجلاسه مـع الاحـرار عـار
وفيـه رجـالٍ حكيـم بكـل راي
=مثل هذا الرجـل تتعبلـه خطـاي
أكسب الحكمه منه واعرف خطاي
=ومن شرى الحكمه شرى عز ووقار
وفيـه رجـالِ ليـا جيـت البلـد
=تذكره وتقـول فـي الديـره ولـد
وترفع الجوال ويجي فـي الوعـد
=قبل ماتاصل يجي لك في المطـار
ويوفـي الواجـب معـك ويكملـه
=مايـرده شغـل بيتـه وعمـلـه
وكان لك موضوع ابـد مايهملـه
=يجتهد حتى يجيـب الـك القـرار
وفيـه رجـالٍ ضعيفـه همـتـه
=عن سنـا الواجـب بريّـه ذمتـه
انشده عـن خالتـه مـع عمتـه
=للربايـع ذيـب ويحـب السمـار
وفيه رجالٍ مـع انسابـه لطيـف
=محترمهم وان لفوا دمـه خفيـف
مايغيـره الشتـا والا الخـريـف
=حافظٍ حـق النسـب مايـوم بـار
وفيـه رجـالٍ يـدور للعـيـوب
=كل همه يعـرف اللـي فالجيـوب
حول جيرانـه وطاقتهـم يجـوب
=ماحفظ جـاره ولا حـق الجـوار
وفيه رجـالٍ لـو الجـار اجنبـي
=حافـظٍ ماجـا مـن الله والنبـي
طاهـرٍ مسلـم ودمعـه يعـربـي
=الله انه يسعده مـن حيـث سـار
وفيه رجـالٍ ليـا طـال الطريـق
=يضحك حجاجه ويانعـم الصديـق
كـل همـه ياخويّـه ماتضـيـق
=يخدمك في ليـل والا فـي نهـار
وفيه رجـالٍ ليـا طـال الطريـق
=انطوى زعلان وش هـذا الرفيـق
لو تقول احسنـت ولعهـا حريـق
=كـدر الطرقـه وعيّفـك المسـار
وفيـه رجـالٍ يسمونـه كـريـم
=مايطاوع في عشا ضيفـه حريـم
مثل جدانه علـى العهـد القديـم
=عامـرٍ بيتـه كـرم شبـاب نـار
وفيه رجالٍ ليا شـاف الضيـوف
=دس راسـه لايقـدم لـه خـروف
عادته والا تـرى مابـه ظـروف
=راس مالـه فالمبانـي والعـقـار
وفيه رجالٍ ليـا اعطيتـه سلـف
=اعتبر مـاراح مـن عنـدك تلـف
وكـان ردّه بعـد ماريقـك نشـف
=قـال شـرّه بـي وزوّد بالعيـار
وفيه رجـالٍ يحـب العلـم مـوت
=همه يشوت الجهل بالعلـم شـوت
لين ياصل للشيوخ اهل البشـوت
=ويعرف الفتوى ويصبح مستشـار
وفيه رجـال ادرعٍ مثـل الهريـد
=مايفيـد ان جـوه ربعـه مايفيـد
حاكمه فيـه المـره كنـه جويـد
=كـل همـه فالملاهـي والصغـار
وفيه رجـالٍ صـدوق ليـا هـرج
=يوم بعض الناس في هرجه عـوج
هرجتـه تعـدل ملاييـن الحجـج
=بالحقيقه ماعلـى هرجـه غبـار
وفيه رجالٍ كـذوب ابـن الحـرام
=ومالقاه اخفاه فـي جنـح الظـلام
مايميـز فالـحـلال وفالـحـرام
=ناسيٍ ساعه يجي فيهـا احتضـار
وفيـه رجـالٍ شجيـعٍ مايهـاب
=سيـف للعـدوان قطّـاع الرقـاب
ماذكر في يوم عن ميقـاف غـاب
=حر مايرضى الخطا والـدم حـار
وفيه من يخشى المنيّـه لاتجيـه
=محتـرص كنـه دخيـلٍ فالوجيـه
مايهمـه لـو تسبـه وتهجـيـه
=ولو تقول الموت شال فلان طـار
وفيـه رجـالٍ رضـيّ الوالديـن
=مايطاوع حرمتـه فـي هالثنيـن
لـو محبتهـا طغـت فالمهجتيـن
=عنده امـه والابـو نـور الديـار
وفيـه رجـالٍ صتيمـه مبهـمـه
=تـدّرِج عينـه ولااحـدٍ يفهـمـه
كـل همـه كثـر ضانـه وبهمـه
=لو يمـوت اخـوه ماهـل العبـار
ياسعد هـذي تواصيـف الرجـال
=واختر لنفسـك وفيّـات الخصـال
لاتخلـي للـردى حولـك مجـال
=عش عزيز النفس لـوزادك قفـار
وفالختام ازكـى تحيـه واحتـرام
=للرجال اللـي لهـا قـدر ومقـام
والتمس منهم عذر قبـل السـلام
=والكمـال لواحـدٍ شـق البحـار